"ე.წ. ქობულეთის კლასტერთან კონტაქტში მყოფი 305 პირი გამოიკვეთა, 1600 ადამიანს თერმოსკრინინგი ჩაუტარდა და 13 პირის მდგომარეობა საყურადღებოა"

ე.წ. ქობულეთის კლასტერთან კონტაქტში 305 პირი გამოიკვეთა, - ამის შესახებ აჭარის ჯანდაცვის მინისტრმა ზაალ მიქელაძემ სოფელ გვარას საგუშაგოსთან შემაჯამებელ ბრიფინგზე განაცხადა.

მისი ინფორმაციით, კონტაქტების კვლევა ამ დრომდე მიმდინარეობს.

ზაალ მიქელაძის განცხადებით, ქობულეთის ოთხ სოფელში, სადაც საკარანტინო ზონა გამოცხადდა, 1600-ზე მეტ ადამიანს თერმოსკრინინგი ჩაუტარდა. 1600-დან 13 პირის ჯანმრთელობის მდგომარეობა საყურადღებოა.

"გამოკითხულ 13 მოქალაქეს, ბოლო ორი კვირის განმავლობაში გარკვეული ჩივილები ჰქონდა, რომელიც ვირუსის დამახასიათებელ სიმპტომებს ჰგავს, თუმცა დღეს ისინი თავს კარგად გრძნობენ, მათზე სამედიცინო კონტროლი დაწესდა", - აღნიშნა ზაალ მიქელაძემ.

ცნობისთვის, დღეს ქობულეთის მუნიციპალიტეტის ოთხ ადმინისტრაციულ ერთეულში მკაცრი საკარანტინო რეჟიმი დაწესდა.