"უკეთესი იქნება, საგანგებო მდგომარეობის ორი კვირით გახანგრძლივება" - თენგიზ ცერცვაძე

თბილისის ინფექციური საავადმყოფოს დირექტორი თენგიზ ცერცვაძის აცხადებს, რომ სასურველია თუ ქვეყანაში საგანგებო მდგომარეობა 21 აპრილის შემდეგ ცოტა ხნით კიდევ გაგრძელდება.

"ჩემი პოზიცია ასეთია - დღევანდელ სიტუაციაში უკეთესი იქნება, საგანგებო მდგომარეობის ორი კვირით გახანგრძლივება. რაც უფრო მკაცრად დავიცავთ შეზღუდვებს და იმ რეკომენდაციებს, რაც აქვს მთავრობას, მით უფრო ჩქარა გავივლით პიკს და გავუშვებთ ეპიდემიას დაღმავალი გზით.

დააკვირდით, რაც უფრო მკაცრად შევასრულებთ დღეს შეზღუდვებს, მით უფრო ჩქარა გავთავისუფლდებით ამ შეზღუდვებისგან. ეს ყველამ გაიაზროს. არ უნდა იყოს - კარგი ამინდი გამოვიდა, მოდი გავიდეთ, შევიკრიბოთ, ვისეირნოთ - ეს გამოიწვევს ამ მდგომარეობის გახანგრძლივებას. რა გვირჩევნია? გავიჭირვოთ ცოტა მეტად და ეს გაჭირვება დამთავრდეს მოკლე დროში, თუ გავიჭირვოთ ნაწილობრივ და ეს გაგრძელდეს დიდხანს? მგონი პასუხი ნათელია" - განაცხადა ცერცვაძემ "მოამბის" ეთერში ჩართვისას.

შეგახსენებთ, საგანგებო მდგომარეობა საქართველოს მასშტაბით 30 მარტს გამოცხადდა და ის 21 აპრილამდე გასტანს.