მე არ მაქვს ფეისბუქი, ჩემი სახელით შექმნილია ყალბი გვერდი, მასზე გამოქვეყნებული ინფორმაციის ავტორი მე არ გახლავართ - მარინა ეზუგბაია

თბილისის ინფექციური საავადმყოფოს სამედიცინო დირექტორი, მარინა ეზუგბაია აცხადებს, რომ „ფეისბუქში“ მისი სახელით ყალბი ანგარიშია შექმნილი. ეზუგბაია მოსახლეობას მოუწოდებს, სოციალურ ქსელში მისი სახელით გავრცელებულ ინფორმაციას არ ენდოს.

„მინდა, ერთი განცხადება გავაკეთო. მე არ მაქვს ფეისბუქი, ჩემი სახელით შექმნილია ყალბი ფეისბუქი. მასზე გამოქვეყნებული მოსაზრებების და ინფორმაციის ავტორი მე არ გახლავართ, ამიტომ არ მიაქციოთ ამას ყურადღება. სოციალური ქსელებით არ ვსარგებლობ, ყველა ეს ინფორმაცია არის ყალბი და ამას, როგორც ჩემი სახელით გამოქვეყნებულ მასალებს, ყურადღებას ნუ მიაქცევთ, ძალიან გთხოვთ,“ - განაცხადა მარინა ეზუგბაიამ.

რაც შეეხება თბილისის ინფექციური საავადმყოფოში განთავსებულ პაციენტებს, მარინა ეზუგბაიას განცხადებით, მათთან ამჟამად კორონავირუსით ინფიცირებული 39 პაციენტია მოთავსებული. როგორც ეზუგბაიამ ჟურნალისტებს განუცხადა, მათგან 2 პაციენტი კვლავ მძიმეა.

“გუშინ დილას ამ დროისთვის გვქონდა 296 დადასტურებული შემთხვევა, დღეს დილამდე დაემატა 10 და ახლა გვაქვს 306 შემთხვევა. 10 ახალი შემთხვევის ეპიდემიოლოგიური კვლევა მიმდინარეობს და მისი წყაროების გარკვევა. ამ 10 შემთხვევიდან 2 ახალი პაციენტია მოთავსებული ჩვენთან, დანარჩენი სხვა კლინიკებშია განთავსებული. გამოჯანმრთელებული 69 გვყავს და ამ ეტაპზე კლინიკებში 237 პაციენტი მკურნალობს. დღეს ჩვენს ცენტრში 39 პაციენტი მკურნალობს, გამოჯანმრთელებული 46-ია. გუშინ ჩატარდა კვლევები და პირველ ტესტზე უარყოფითი პასუხი მივიღეთ 5 პაციენტთან და გაგრძელდება ამათი კვლევა. 39-დან 2 მძიმე პაციენტი გვყავს, პრობლემური, რომელიც კრიტიკულ სიტუაციას უახლოვდება, თუმცა მათი მდგომარეობა სტაბილურია და გუშინდელს მერე დაავადების პროგრესირება არ შეინიშნება. არასრულწლოვნები ამ ეტაპზე გვყავს ექვსი, ერთი ყველაზე პატარაა და თქვენ წარმოიდგინეთ, ის ყველაზე კარგად გრძნობს თავს, დანარჩენების მდგომარეობაც დამაკმაყოფილებელია”, - განაცხადა ეზუგბაიამ.