რა ხდებოდა თბილისის მაღაზიებთან, სანამ ქვეყნის მასშტაბით ავტომანქანებით გადაადგილება აიკრძალებოდა

დილიდან ხალხმრავლობა იყო თბილისის დიდ სუპერმარკეტებთან და სასურსათო მაღაზიებთან. მოქალაქეები მანქანით გადაადგილების აკრძალვამდე, ანუ 12:00 საათამდე ასწრებდნენ საჭირო მარაგის გაკეთებას, განსაკუთრებით იმის გათვალისწინებით, რომ წინ აღდგომის დღესასწაულია.

მოქალაქეებს გრძელ რიგებში მოუწიათ დგომა, რაც "პალიტრანიუსის" მიერ გადაღებულ კადრებშიც ჩანს.

დიდ სუპერმარკეტებთან საპატრულო პოლიციაც იყო მობილიზებული, რომელიც მოქალაქეებს დისტანციის დაცვისკენ მოუწოდებდა.

შეგახსენებთ, დღეს 17 აპრილის 12:00 საათიდან 21 აპრილის ჩათვლით იკრძალება მსუბუქი ავტომანქანით გადაადგილება მთელი ქვეყნის მასშტაბით.

ამასთან, დღეიდან დახურულ საჯარო სივრცეში პირბადის გარეშე გადააადგილება იკრძალება. ასევე, დღეიდან 10 დღის ვადით საქართველოს ქალაქებში სასაფლაოზე გასვლაზე შეზღუდვები წესდება.