ავტორი:

გზა "კომაროვიდან" ბერობამდე - უცნობი ფაქტები სკანდალურ მეუფეზე, რომელიც ბერად 41 წლის ასაკში აღიკვეცა

გზა "კომაროვიდან" ბერობამდე - უცნობი ფაქტები სკანდალურ მეუფეზე, რომელიც ბერად 41 წლის ასაკში აღიკვეცა

სკანდალური მეუფე, რომელიც საზოგადოებისთვის შოკისმომგვრელი განცხადებებით გამოირჩევა, ბერობის გზას 41 წლის ასაკში დაადგა.

1962 წლის 1 მარტს თბილისში დაბადებული მთავარეპისკოპოსის საერო ცხოვრებიდან ძალიან ცოტა რამ არის ცნობილი. დაამთავრდა კომაროვის სახელობის ფიზიკა-მათემატიკური სკოლა და შემდეგ სწავლა გააგრძელა ივანე ჯავახიშვილის სახელმწიფო უნივერსიტეტის მექანიკა-მათემატიკის ფაკულტეტზე.

ამის შემდეგ იაკობის საერო ცხოვრების შესახებ ინფორმაცია არ არსებობს, თუმცა ფორუმებსა და სოციალურ ქსელში სხვადასხვა დროს ვრცელდებოდა დაუდასტურებელი ინფორმაცია მისი "მხედრიონში" მოღვაწეობის შესახებ, თუმცა ამ თემაზე ქორეპისკოპოსს არასოდეს უსაუბრია.

მეუფე იაკობი 2003 წელს

2003 წლის 15 მარტს კონსტანტინე იაკობაშვილი ბერად აღიკვეცა და სახელად იაკობი ეწოდა. შემდეგ იყო არქიმანდრიტი, ქორეპისკოპოსი, 2013 წლიდან კი ბოდბელი ეპისკოპოსია.

2019 წლის 9 ივნისს იაკობს მთავარეპისკოპოსოპა უბოძეს.

საპატრიარქოს კარზე ყველაზე გავლენიან მეუფეს თავისი ფავორიტი პოლიტიკოსები ჰყავს. ამბობენ, რომ ის მეგობრობს ირაკლი ღარიბაშვილთან და ე.წ. "კახურ კლანთან". იაკობს ნათელმირონობა აკავშირებს სუს-ის უფროსის მოადგილის სოსო გოგაშვილის ოჯახთან. ის მისი ერთ-ერთი შვილის ნათლიაა. როგორც მედიაში იწერებოდა, სწორედ გოგაშვილის სამსახურიდან წასვლის შემდეგ ძალიან გაბრაზდა ხელისუფლებაზე მთავარეპისკოპოსი და არაერთი სკანდალური განცხადებაც გააკეთა.

ცნობილია, რომ მას განსაკუთრებულად არ უყვარს ახლანდელი პრემიერ-მინისტრი გიორგი გახარია

"გიორგი გახარია ჩემთვის ჩვეულებრივი მოსკოვის კაცია, თუ ის პრემიერ-მინისტრი გახდა, ეკლესიასთან მთავრობას დიდი პრობლემა ექნება, მე არ მაქვს მასთან ნორმალური ურთიერთობა. არ არის ისეთი რაღაც, რომ მე ვიღაცას რაღაც ვაპატიო, რაც საპატიებელი არ არის. ვერ გახდება პრემიერი..."- განაცხადა მეუფე იაკობმა ჯერ კიდევ 2018 წელს "ტვ-პირველთან" ინტერვიუში.

გახარია პრემიერი გახდა, მაგრამ როგორც იაკობმა იწინასწარმეტყველა, დღეს ხელისუფლებას ეკლესიასთან არც ისე დალაგებული ურთიერთობა აქვს და ეს ბოლო დღეებმაც გვაჩვენა.

საზოგადოებას კარგად ახსოვს მეუფე იაკობისა და მეუფე პეტრე ცაავას დაპირისპირება "ციანიდის სკანდალის" დროს. თუმცა წლების წინ ორი მეუფე საკმაოდ ახლო მეგობრები იყვნენ და იაკობი ჭყონდიდის ეპისკოპოსის, მეუფე პეტრეს ხელდასმული მეუფეა.

მეუფე იაკობს ეკუთვნის კიდევ ერთი სკანდალური განცხადება, როდესაც ტელევიზიით ერთ-ერთ ინტერვიუში განაცხადა, რომ კვირიკაშვილთან, გახარიასთან და გომელაურთან შეხვედრის დროს მას "ეჩალიჩებოდნენ" პატრიარქის გადაყენებაზე და მის ნაცვლად მეუფე შიოს ტახტზე ასვლაზე.

"მეუფე იაკობი ცემით ემუქრებოდა ერთ-ერთ ბიზნესმენს" - ეს განცხადება თავის დროზე მეუფე პეტრეს ეკუთვნის, რომელიც მოგვიანებით იაკობმა ასე ახსნა:.

"მე ვფიქრობ, არის ერთი ადამიანი, ბიზნესმენი, რომელიც მერე უწმინდესთან მიბრძანდა, ადრე ვთქვი, იმასაც ვიტყვი რომელი ბიზნესმენია. მან უთხრა - დაისვენეთ, თქვენო უწმინდესობავ, თქვენ ნუ იქნებით, ის იქნებაო, კონკრეტულ პიროვნებაზე უთხრა. მე ვფიქრობ, ძალიან დიდი ფულიც აქვს გადახდილი, არავის არ ვაპატიებ ამას. მაშინ რომ ვიყავი კვირიკაშვილთან და იმათთან, ზუსტად ეს ვუთხარი, არავის არ ვაპატიებ ამას-მეთქი. უწმინდესი სანამ არ მომცემს ნებას, რომ ვცემო, მაგრად ვცემო, მთელი ერის წინაშე ცუდ დღეში ჩავაგდებ მას", - განაცხადა მან.

მეუფე იაკობი არ სწყალობს საქართველოს პრეზიდენტ სალომე ზურაბიშვილსაც, წინა საარჩევნოდ მას "კანაფის დედოფალიც" კი უწოდა. შეგახსენებთ, რომ სწორედ იმ პერიოდში განიხილავდა პარლამენტი კანონპროექტს მარხუანას კულტივირების შესახებ, როდესაც სალომე ზურაბიშვილმა წინასაარჩევნო კამპანიის დროს განაცხადა, რომ ნარკოტიკების დეკრიმინალიზაციის მომხრეა.

საზოგადოებამ კიდევ ერთხელ გაიხსენა მეუფე იაკობის კიდევ ერთი 2019 წლის ოქტომბრის თვის სკანდალური ჩართვა, ამჯერად ვახო სანაიასთან.

"პირდაპირ გეტყვით, ჩემს მეგობრებთან ერთად დამავალეს, რომ მეუფე, რა ჰქვია, იმას, გერასიმესთვის 400 ათასი დოლარი გადამეცა. ბიძინამ მილიონი ლარის ის რომ იყო, მეუფე შიოზე. ჩემი მეგობარია, ანდრია და იმან გამოთქვა ძალიან დიდი ისა, დედა აგინა ყველას, საგინებელია, არამარტო ვაგინებთ, დედებს მოვუკითხავთ ყველას. ჩემთან ვერ ეცდებიან, მაპატიეთ, მკიდია, ისინიც და ისინიც. ბიძინათი დაწყებული ყველათი დამთავრებული, დედას იმას ვუზამ ყველას..." - განაცხადა იაკობმა.

მთავარეპისკოპოსი იაკობი დღესაც ყურადღების ცენტრშია. ის არ ატარებს პირბადეს ვირუსისგან დასაცავად, პაატა იმნაძეს სთხოვს, რომ მიცვალებულების ნაცვლად კორონათი ინფიცირებულები ითვალოს და ასევე გამყრელიძე-იმნაძის დუეტზე მედიასთან აცხადებს:

"რომ გვიყვირიან, არავინ არ ვართ დავალებული მაგათგან, რომ ასე გველაპარაკონ. ტონს არ იცავენ, კუბოებზე ლაპარაკობენ. თვითონაც თავს თუ ვერ იკავებენ ფსიქოანალიტიკოსებთან გაიარონ კონსულტაცია. ჭკუა აქვთ, რომ იძახიან აღდგომას არ მიხვიდეთო ეკლესიაში? - ამ ორ ადამიანზე ვლაპარაკობ, უნდა გამოვიდნენ ბოდიში მოიხადონ, რომ ღირსება შერჩეთ....“"- ეს გახლავთ სწორედ მთავარეპისკოპოსი იაკობის ბოლო სკანდალური განცხადება.