ტურისტები, რომლებიც პანდემიის გამო ინდოეთში ჩარჩნენ, გამოქვაბულში იპოვეს - "ფული გამოელიათ და სასტუმროს დატოვება მოუხდათ"

კორონავირუსის პანდემიის გამო შეზღუდვების გამოცხადების შემდეგ, ინდოეთში ჩარჩენილი ექვსი ტურისტი ერთ-ერთ გამოქვაბულში ცხოვრობდა. მათ შესახებ CNN წერს. გამოცემის ცნობით, ტურისტების ჯგუფი ქალაქ რიშიკეშთან ახლოს მდებარე გამოქვაბულში თითქმის ერთი თვე ცხოვრობდა. ისინი პოლიციამ იპოვნა და ორკვირიან საკარანტინე რეჟიმში გადაიყვანა.

ტურისტებს შორის იყო 4 მამაკაცი და 2 ქალი - საფრანგეთიდან, თურქეთიდან, უკრაინიდან, აშშ-დან და ნეპალიდან. ისინი სასტუმროში ცხოვრობდნენ, თუმცა ფრენების შეჩერების შემდეგ, ვერც ინდოეთი დატოვეს, ფულიც გამოელიათ და იძულებულნი გახდნენ სასტუმროდან წასულიყვნენ და გადაწყვიტეს, გამოქვაბულში დასახლებულიყვნენ.

"ისინი გამოქვაბულში 24 მარტიდან ცხოვრობდნენ. პოლიციამ გასულ კვირას იპოვა და ორკვირიან კარანტინში გადაიყვანა, თუმცა პირველადი შეფასებით, ჯანმრთელები ჩანან“, - ამბობს ინდოეთის პოლიციის წარმომადგენელი მუკეშ ჩანდი CNN-თან.

მისივე ინფორმაციით, სასტუმროდან წამოსვლის შემდეგ დარჩენილი თანხა ელემენტარული ნივთებისა და საკვების საყიდლად გამოიყენეს. პოლიციას კი გამოქვაბულში მცხოვრები ადამიანების შესახებ ერთ-ერთმა ადგილობრივმა შეატყობინა, მას შემდეგ, რაც შემთხვევით აღმოაჩინა, რომ იქ უცხოელები იყვნენ.

ინდოეთში მთელი ქვეყნის მასშტაბით 24 მარტიდან კარანტინია გამოცხადებული. საერთაშორისო ფრენები კი ხელისუფლებამ 20 მარტიდან აკრძალა. ბოლო მონაცემებით, ქვეყანაში COVID-19-ით 18 658 ადამიანი დაინფიცირდა, მათ შორის 592 პაციენტი გარდაიცვალა, ხოლო 3 273 გამოჯანმრთელდა.