ბოლნისში კორონავირუსით ინფიცირებული პაციენტის ოჯახი ექიმებსა და პოლიციელებს დაუპირისპირდა - დამტვრეულია ავტომობილი

ბოლნისის მუნიციპალიტეტის სოფელ მუშევანში ინციდენტი მოხდა. როგორც "ინტერპრესნიუსისათვის" გახდა ცნობილი, სიტყვიერი დაპირისპირება და მცირე შეხლა-შემოხლა იმ დროს მოხდა, როდესაც კორონავირუსით ინფიცირებული პაციენტების კლინიკაში გადასაყვანად ერთ-ერთ ოჯახში მედპერსონალი, სამართალდამცავები და სოფლის რწმუნებული მივიდნენ.

არსებული ინფორმაციით, ოჯახის ახლობლებმა მათ წინააღმდეგობა გაუწიეს, რა დროსაც ქვებით დააზიანეს აღნიშნულ სოფელში მერის წარმომადგენლის ავტომანქანა.

საქართველოს პარლამენტში ბოლნისის მაჟორიტარი დეპუტატის გოგი მეშველიანის განხადებით, მომხდარი ინციდენტის დროს დაშავებულები არ არიან.

როგორც "ინტერპრესნიუსს" მეშველიანმა განუცხადა, ინცინდენტი მონაწილე ახალგაზრდები ნასვამ მდგომარეობაში იმყოფებოდნენ.

"გარკვეულ ინციდენტს ჰქონდა ადგილი, კოვიდინფიცირებული პაციენტების გაყვანის დროს ახალგაზრდები შეეწსრნენ. დეტალებს ვარკვევთ", - აცხადებს მეშველიანი.

მისივე თქმით, დაზიანებულია სოფლის რწმუნებულის მანქანა, თუმცა სასწრაფოს ექიმები და სამართალდამცველები დაშავებულები არ არიან.

ამასთან გოგი მეშველიანი აცხადებს, რომ ამ დრომდე კორონავირუსით ინფიცირებული პაციენტები სოფელში რჩებიან, თუმცა მათთან მიმდინარეობს კონსულტაცია.

"ისინი ერთი ოჯახის წევრები არიან", -განაცხადა მეშველიანმა.