"ორი ადამიანი მოიყოლა, ერთი გადარჩა... მეორეს ბედი ჯერ გაურკვეველია" - გუბერნატორი თუშეთში მეწყერის ჩამოწოლაზე

თუშეთის გზაზე ჩამოწოლილა მეწყერმა ორი ადამიანი მოიყოლა. ამის შესახებ "ინტერპრესნიუსს" კახეთში სახელმწიფო რწმუნებულმა ირაკლი ქადაგიშვილმა განუცხადა.

მისივე ინფორმაციით, ერთი მათგანი მაშველებმა უკვე ამოიყვანეს, ხოლო მეორეს ბედი ჯერჯერობით უცნობია.

"წინასწარი ინფორმაციით, მეწყერმა ორი ადამიანი მოიყოლა. ერთ-ერთი მათგანი გადარჩა, მეორეს ბედი ჯერ არ არის გარკვეული. სამაშველო ბრიგადები უკვე მუშაობენ. იქ სატელეფონო კავშირი ფიზიკურად არ არსებობს და უფრო მეტი დაზუსტებული ინფორმაცია ჯერჯერობით არ მაქვს" - განაცხადა ირაკლი ქადაგიშვილმა.

შეგახსენებთ, რომ შემთხვევა ფშაველი-აბანო-ომალოს გზის 36-ე კილომეტრზე მოხდა.