"ნაკბენების უმრავლესობა გვხვდება ხელზე... არ ვეცადოთ მათ დაჭერას" - ცხოველთა მონიტორინგის სააგენტოში გველებზე გამოძახებები გაიზარდა

ცხოველთა მონიტორინგის სააგენტოს დირექტორის, ვახტანგ ლომჯარიას ინფორმაციით, მაისის მეორე ნახევრიდან სააგენტოში ქვეწარმავლებთან დაკავშირებით ზარების რაოდენობა რადიკალურად გაიზარდა, თუმცა აჟიოტაჟის შექმნის საფუძველი არ არსებობს.

მისივე განცხადებით, ქვეწარმავლების თავდასხმისგან თავის ასარიდებლად ყველამ უნდა მოუაროს საკუთარ ეზოს და მოახდინოს ნარჩენების მართვა.

„მაისის მეორე ნახევრიდან, უცებ დათბობასთან ერთად, რადიკალურად გაიზარდა ჩვენთან ზარების რაოდენობა და შეიქმნა აჟიოტაჟი, თუმცა არაფერი განსაკუთრებული არ ხდება. საქართველოში არის უამრავი არეალი, სადაც ქვეწარმავლები ბინადრობენ ბუნებრივად. უნდა მოვუაროთ ჩვენს ეზოს და მოვახდინოთ ნარჩენების მართვა, რომ მღრნელები არ მომრავლდნენ, რასაც მოყვება შემდეგ ქვეწარმავალიც. თუ წავაწყდებით ქვეწარმავალს, მნიშნველოვანია, რომ მისი მიმართულებით არ ვიმოძრაოთ, გადავდგათ ნაბიჯი უკან და გავეცალოთ. ნაკბენების უმრავლესობა გვხვდება ხელზე, როდესაც ადამიანები ცდილობენ მათ დაჭერას. არ ვეცადოთ მათ დაჭერას, გამოვიძახოთ შესაბამისი სამსახურები, სპეციალისტები და ჩვენი მობილური ჯგუფი 24 საათის განმავლობაში მზად არის მოგემსახუროთ,“ - განაცხადა ვახტანგ ლომჯარიამ.

• როგორ ამოვიცნოთ შხამიანი გველი და როგორ მოვიქცეთ, თუ გველმა დაგვგესლა