ბიძინა ივანიშვილმა და ეკატერინე ხვედელიძემ ქუთაისის საერთაშორისო უნივერსიტეტი დაათვალიერეს

"ქართული ოცნება-დემოკრატიული საქართველოს" თავმჯდომარე ბიძინა ივანიშვილი მეუღლესთან, ეკატერინე ხვედელიძესთან ერთად ქუთაისის მშენებარე უნივერსიტეტს ესტუმრნენ.

ივანიშვილების წყვილი ქუთაისის საერთაშორისო უნივერსიტეტის დამფუძნებლები არიან და როგორც სასწავლებლის მიერ გავრცელებულ ინფორმაციაში ვკითხულობთ, ისინი პირველი ეტაპის დასრულებულ სამუშაოს გაეცნენ.

2020-2021 სასწავლო წელს ქუთაისის საერთაშორისო უნივერსიტეტი (KIU) სტუდენტების პირველ ნაკადს მიიღებს.

უნივერსიტეტის საიტზე ვკითხულობთ, რომ KIU-ს კამპუსი მოიცავს სტუდენტების და პერსონალის საცხოვრებლებს, აკადემიურ შენობებს, ბიბლიოთეკას, კაფეებს, შიდა და გარე სარეკრეაციო სივრცეებს, ელექტრო ტრანსპორტს, ველობილიკებს, რაც საუნივერსიტეტო ქალაქში ცხოვრებას მრავალფეროვანსა და განუმეორებელს ქმნის.