Covid-19-ით ინფიცირებული აბიტურიენტი გამოცდებში მონაწილეობას ვერ მიიღებს - რა ბედი ელის 9 აბიტურიენტს, რომლებიც ინფიცირებულთან ერთად ისხდნენ?
შეფასებისა და გამოცდების ეროვნული ცენტრის ხელმძღვანელის სოფო გორგოძის განცხადებით, აბიტურიენტს, რომელსაც კორონავირუსი დაუდასტურდა, ერთიან ეროვნულ გამოცდებში მონაწილეობის უფლება არ აქვს.
„ეს აბიტურიენტი ახლა გადის შესაბამის მკურნალობას და ვერ მონაწილეობს საგამოცდო პროცესში. რაც შეეხება იმას, დაინიშნება თუ არა განმეორებითი გამოცდები, მას შემდეგ რაც ეს პროცესი დასრულდება, სამწუხაროდ, ჩვენ გამოცდების განმეორებითი დანიშვნის შესაძლებლობა არ გვაქვს,“ - განაცხადა გორგოძემ.
ცნობისთვის, სტუდენტური ომბუდსმენის წარმომადგენლებმა განათლების სამინისტროს მიმართეს განცხადებით, რომ აბიტურიენტს, რომელსაც კორონავირუსი დაუდასტურდა და ეროვნულ გამოცდებში მონაწილეობა ვერ შეძლო, გამოცდების ჩაბარების შესაძლებლობა გამოჯანმრთელების შემდეგ მიეცეს.
ამ მოთხოვნით სტუდენტური ომბუდსმენის წევრები განათლების სამინისტროსთან იმყოფებოდნენ.
„დღეს სტუდენტურმა ომბუდსმენმა მიმართა განათლების სამინისტროს მოთხოვნით, რომ იმ აბიტურიენტს, რომელმაც „კოვიდ-19“-ით ინფიცირების გამო ვეღარ შეძლო გამოცდებზე გასვლა, შეექმნას პირობები, რომ გამოჯანმრთელების შემდეგ შეძლოს გამოცდებზე გასვლა და ეს წელი, რომელშიც მან საკმაოდ დიდი ძალისხმევა ჩადო და დიდი თანხები გაიღო, დაკარგულად არ ჩაეთვალოს“, - განაცხადა სტუდენტური ომბუდსმენის წარმომადგენელმა სალომე მაისურაძემ.
ცნობისთვის, 7 ივლისს ერთიან ეროვნულ გამოცდაზე გასულ აბიტურიენტს კორონავირუსი დაუდგინდა.
77 წლის მამაკაცი, რომელსაც მაგისტრალზე სატვირთო დაეჯახა, კლინიკაში გარდაიცვალა
"8 ახალი შემთხვევიდან ორის ინფიცირების წყარო უცნობია" - მარინა ეზუგბაია ახალი ინფიცირებულების შესახებ
