"იქ ან მიტყუებით არის მიყვანილი, ან არ ვიცი..." - თეთრიწყაროში 23 წლის თამუნა ბაჩალაიშვილს მესამე დღეა ეძებენ

თეთრიწყაროში 23 წლის თამუნა ბაჩალაიშვილს მესამე დღეა ეძებენ. იგი ქვემო ფონიჭალიდან საკუთარი ავტომობილით გავიდა და კამერებმა ბოლოს თეთრიწყაროს რაიონის სოფელ ხაიშში დააფიქსირეს. ამის შემდეგ მისი კვალი იკარგება. გოგონას გათიშული აქვს მობილური ტელეფონიც და ამ დრომდე ვერ ხერხდება მისი ავტომობილის პოვნაც.

როგორც AMBEBI.GE-ს შინაგან საქმეთა სამინისტროს პრესსამსახურში განუცხადეს, მომხდარზე ძიება სსკ-ის 143-ე მუხლით მიმდინარეობს, რაც თავისუფლების უკანონო აღკვეთას გულისხმობს.

დაკარგული გოგონას დედა ამბობს, რომ თამუნა ბაჩალაიშვილს ხაიშთან არანაირი შეხება არ ჰქონია და უკვირს, იქ საიდან აღმოჩნდა.

"ერთად უნდა წავსულიყავით დასასვენებლად... ვეუბნეოდი, ცემში წავიდეთ თუ ზღვაზეო, მითხრა, ორივეგან წავიდეთო. ძალიან პოზიტიურად იყო. ბოლო კვალი ხაიშში დააფიქსირა კამერამ, რომ იქ შევიდა ბოლოს და გამოსული აღარ დაფიქსირებულა.

იქ არანაირი შეხება არ ჰქონდა და მე ეს მაგიჟებს, რომ ის არ ვიცი ან მიტყუებით არის მიყვანილი, ან არ ვიცი... რა უნდოდა არ ვიცი. ვიღაცას ეძებდაო იქ. ვიღაცეებმა თქვეს გოგოც ეჯდა მანქანაშიო, მერე პოლიციამ თქვა ეგ ჭორიაო,“ - ამბობს "კურიერთან" საუბრისას გოგონას დედა, თეონა თამაზაშვილი.