საქართველოზე შეყვარებული ამერიკელი, რომელსაც უკანასკნელი თხოვნა ქართულად აუსრულეს, გარდაიცვალა

საქართველოზე შეყვარებული ამერიკელი, რომელსაც უკანასკნელი თხოვნა ქართულად აუსრულეს, გარდაიცვალა. ინფორმაცია მეთიუს შესახებ სოციალურ ქსელში ფილიპ კოვალსკიმ გაავრცელა, რომელმაც რამდენიმე კვირის წინ ქართველებს თხოვნით მიმათა, რომ მისიი მომაკვდავი მეგობრისთვის ქართული სუფრის გაკეთება სურდა და ინტერნეტმომხმარებლებისგან რჩევები ითხოვა.

მეთიუს გარდაცვალების შესახებ ქართველი ემიგრანტებიც წერენ: "წუხელ, ოჰაიოს შტატში, საქართველოზე უზომოდ შეყვარებული ახალგაზრდა ბიჭი, მეთიუ გარდაიცვალა, ერთწლიანი ტანჯვა გადაიტანა მეთიუმ. ბოლოს კი ვერაგი ავადმყოფობა მოერია. გახსოვთ, როცა მთელი ოჰაიოს ქართველობა ფეხზე დადგა და უნდოდათ ქართული სუფრის გაშლა მეთიუსთვის?

საქართველოს საელჩომ მზარეული გამოუგზავნა სახლში და შესანიშნავი სუფრა გაუშალეს მეთიუს.ვუსამძიმრებთ მეთიუს ოჯახს, მეგობრებს და ყველას, ვინც იცნობდა ამ ნათელ ახალგაზრდას" - წერს თინა ბედიაშვილი ჯგუფში "ჩვენ ამერიკაში", სადაც სწორედ აშშ-ში მცხოვრები ემიგრანტები არიან გაერთიანებული.

ცნობისთვის, მეთიუ საზოგადოებამ რამდენიმე კვირის წინ გაიცნო, როდესაც მის შესახებ Spend 4 Seasons in Georgia-ს "ფეისბუქის" გვერდზე დაიწერა. მეთიუს, რომელიც ოჰაიოში ცხოვრობდა, ავთვისებიანი სიმსივნის ბოლო სტადია ჰქონდა და ექიმებმა მას სიცოცხლის მაქსიმალურ ვადად 2 თვე განუსაზღვრეს.

მეთიუს ერთ-ერთი ბოლო სურვილი იყო კიდევ ერთხელ გაესინჯა გემრიელი ქართული კერძები. მეთიუს უკანასკნელი სურვილი ახდა აშშ-ში საქართველოს საელჩოს დახმარებით - ელჩმა, დავით ბაქრაძემ მეთიუს სახლში მზარეულები გაუგზავნა და მას წერილიც მისწერა.