COVID-19-ის აფეთქების ახალი ეტაპი ესპანეთში - ბრიტანეთმა ის უსაფრთხო ქვეყნების სიიდან ამოიღო

ესპანეთში კორონავირუსის პანდემიის გამო დაწესებული შეზღუდვების მოხსნის შემდეგ, ახალ ინფიცირებულთა რაოდენობა კვლავ მკვეთრად გაიზარდა. თუ 16 ივლისამდე ახალი შემთხვევების ყოველდღიური რაოდენობა 500-საც არ აღწევდა, 16 ივლისის შემდეგ, ყოველ დღე, ათასზე მეტი ინფიცირებულს აღწერდნენ და ზოგ შემთხვევაში, რაოდენობამ 2 ათასსაც გადააჭარბა.

აღნიშნულის გამო, ქვეყნის ზოგიერთ რეგიონში წესები კვლავ გაამკაცრეს, სავალდებულო გახდა პირბადის ტარება და ზოგიერთ ქალაქში კვლავ კარანტინის მკაცრი რეჟიმი დაწესდა. ინფიცირებულთა რაოდენობა ყველაზე მეტად იზრდება ბარსელონაში, სარაგოსაში და დედაქალაქ მადრიდში.

BBC-ის ცნობით, კორონავირუსის შემთხვევების ზრდის გამო, კატალონიის მთავრობამ ღამის ბარები და კლუბები დახურა. როგორც გამოცემა წერს, რეგიონში ღამის ბარები და კლუბები მომავალი ორი კვირის განმავლობაში იქნება დაკეტილი, შემდეგ კი გახსნის გადაწყვეტილებას ეპიდსიტუაციის გათვალისწინებით მიიღებენ.

ესპანეთში ინფიცირებულთა რაოდენობის გაზრდასთან დაკავშირებით განცხადება გააკეთეს ჯანდაცვის მსოფლიო ორგანიზაციაშიც. ჯანმო-ში მიიჩნევენ, რომ მკაცრი შეზღუდვების კვლავ დაწესებაა საჭირო.

"ევროპის ზოგიერთ ქვეყანაში კორონავირუსის შემთხვევების ზრდა ნამდვილად შემაშფოთებელია. ჩვენ უნდა ვიმოქმედოთ პასუხისმგებლობით და ყურადღებით. ვფიქრობთ, საჭიროა შეზღუდვების კვლავ დაწესება“, - აცხადებენ ორგანიზაციაში.

აღსანიშნავია, რომ ესპანეთში მოგზაურობისგან თავის შეკავებისკნ მოუწოდებენ მოქალაქეებს სხვადასხვა ქვეყნების ხელისუფლების წარმომადგენლები. ასეთ ქვეყნებს შორისაა საფრანგეთი. ნორვეგია კი ესპანეთიდან ჩასულ მოქალაქეებს სავალდებულო კარანტინში უშვებს.

ამასთან, ბოლო დღეების მთავარი ამბავი ისაა, რომ დიდმა ბრიტანეთმა ესპანეთი უსაფრთხო ქვეყნების სიიდან ამოიღო, რაც იმას ნიშნავს, რომ ესპანეთიდან დიდ ბრიტანეთში ჩასულ ადამიანებს 14-დღიანი სავალდებულო კარანტინის გავლა მოუწევთ.

დიდი ბრიტანეთის საგარეო საქმეთა მინისტრის, დომინიკ რააბის განცხადებით, ქვეყანამ სწრაფად იმოქმედა, როცა ესპანეთიდან ჩამსვლელ მგზავრებს კარანტინი დაუწესა მას შემდეგ, რაც ესპანეთში კორონავირუსის ახალი შემთხვევების უეცარი ზრდა დაფიქსირდა. Sky News-თან საუბრისას საგარეო საქმეთა მინისტრმა, უეცარი გადაწყვეტილების მიღების მიზეზად ესპანეთის ბოლო ეპიდემიოლოგიური მონაცემები დაასახელა.

"ვიცით, რომ ეს დამსვენებლებისთვის შეფერხებას გამოიწვევს, მაგრამ ჩვენ ვერ მოვიხდით ბოდიშს ასე მოქცევის გამო. ჩვენ უნდა შეგვეძლოს სწრაფი და გადამწყვეტი მოქმედებები. ეს ნაბიჯი იყო რეალურ დროში რეაგირება. გადაწყვეტილება მივიღეთ ისე სწრაფად, როგორც შეგვეძლო“, - განაცხადა დომინიკ რააბმა.

ყოველივეს ფონზე, ერთ-ერთი მთავარი საკითხი, რომელიც საზოგადოების ნაწილს, განსაკუთრებით კი ფეხბურთის გულშემატკივრებს ახლა ძალიან ადარდებთ, ჩემპიონთა ლიგის ფარგლებში "მანჩესტერ სიტისა“ და მადრიდის "რეალს“ შორის გასამართი მატჩია. გავლენიანი სპორტული გამოცემა marca.com არ გამორიცხავს ამ მნიშვნელოვანი საფეხბურთო მატჩის ჩაშლას.

თამაში 7 აგვისტოს, მანჩესტერში "ეტიჰადას“ სტადიონზე უნდა გაიმართოს, თუმცა არსებული რეგულაციებით, "რეალის“ ფეხბურთელებს 2-კვირიანი კარანტინის გავლა მოუწევთ. არ არის გამორიცხული, რომ მატჩი რომელიმე სხვა ქვეყანაში გაიმართოს.

აღსანიშნავია, რომ დიდი ბრიტანეთის მიერ ესპანეთის უსაფრთხო ქვეყნების ნუსხიდან ამოღებას ესპანეთის საგარეო საქმეთა მინისტრიც გამოეხმაურა. არანჩა გონსალესი აცხადებს, რომ ესპანეთი უსაფრთხოა ტურისტებისთვის. მისივე თქმით, მართალია ქვეყანაში ვირუსის აფეთქების რამდენიმე კერა ფიქსირდება, თუმცა სპეციალისტები ყველაფერს აკონტროლებენ და ყოველივე საფრთხის შემცველი არ არის.

ესპანეთი ინფიცირებულთა რაოდენობის მიხედვით მსოფლიოს მეცხრე ქვეყანაა და სულ COVID-19-ის 319 501 შემთხვევაა აღწერილი, გარდაცვლილია 28 432 პაციენტი, ხოლო გამოჯანმრთელებულთა რაოდენობა 150 ათასს აჭარბებს.