"ზღვიდან სახლში ბრუნდებოდნენ, როცა ეს საშინელება მოხდა" - ანაკლია-განმუხურის გზაზე ავარიას 17 წლის ბიჭები ემსხვერპლნენ
ანაკლია-განმუხურის გზაზე მომხდარი ავტოსაგზაო შემთხვევის შედეგად გარდაცვლილები 17 წლის ახალგაზრდები არიან. ისინი კლასელები იყვნენ და ზღვიდან სახლში, სოფელ ორულუში ბრუნდებოდნენ.
AMBEBI.GE-ს ინფორმაციით, ორი გარდაცვლილი, ლევან მაქაცარია და იაკობ ოთხოზორია რაგბის კლუბ "ზუგდიდში" თამაშობდნენ.
ცოტა ხნის წინ ბიჭების გარდაცვალების შესახებ კლუბის "ფეისბუქის" გვერდზე ინფორმაციაც გავრცელდა:
"სამწუხარო ინფორმაცია ავტოკატასტროფაში გარდაიცვალა რაგბი კლუბი ზუგდიდის ორი მოთამაშე იაკობ ოთხოზორია ლევან მაქაცარია . კლუბის სახელით ვუსამძიმრებთ მათ ოჯახებს , უფალმა გაგაძლიეროთ ამ მძიმე ჟამს" - წერია ინფორმაციაში.
როგორც AMBEBI.GE-სთან საუბრისას სოფლის რწმუნებულმა ვალერ პერტაიამ განაცხადა, სამივე ახალგაზრდის ცხედარი ქუთაისში ექსპერტიზის ბიუროშია გადასვენებული.
"საშინელება მოხდა. ერთ-ერთი ჩემს თვალწინ გაზრდილი ბავშვია. რა ვთქვა არ ვიცი, საშინელებაა. სამივე კლასელები იყვნენ. წელს დაამთავრეს სკოლა. ზღვაზე იყვნენ და სახლში ბრუნდებოდნენ. მეოთხეც იყო, მაგრამ ის გადარჩა და საავადმყოფოშია",- ამბობს ზუგდიდის სოფელ ორულუს რწმუნებული ვალერ პერტაია.
ავტოსაგზაო შემთხვევა განმუხური-ანაკლიის საზღვართან დღეს საღამოს მოხდა. მსუბუქ ავტომანქანა, რომელშიც ოთხი ახალგაზრდა იმყოფებოდა, გზის სავალი ნაწილიდან გადავიდა და ჭადრის ხეს შეეჯახა. სამი ახალგაზრდა ადგილზე გარდაიცვალა, ერთი კი დაშავდა.
მთავარი ფოტო: ლევან მაქაცარია და იაკობ ოთხოზორია
"ავტომობილში მომხვდა რაღაც ხელკეტი და ერთხელ დავარტყიო..." - შაქარაშვილის საქმეზე დაკავებული ნიკა ჟვანია ინციდენტში მონაწილეობას აღიარებს
"მივმართავ მკვლელს, არ შერჩება! მიწიდან ამოვთხრი" - თამარ ბაჩალიაშვილის დედა
