"ვნახავ ქალბატონ ნინოს... რაც შემიძლია მხარს დავუჭერ, მეცოდება" - გოგი თოფაძე ამბობს, რომ ბუსა ჟვანიასთვის სასჯელის დამძიმება მისი სურვილი არ იყო

ლევან თოფაძის დაჭრის საქმეზე დაკავებული ბუსა ჟვანიას დედა ნინო ქადაგიძე დაზარალებულის ოჯახს ბოდიშს უხდის. ამის შესახებ მან საქალაქო სასამართლოსთან განაცხადა.

"პირველ რიგში, მინდა ბოდიში მოვუხადო ოჯახს და ვუთხრა, რომ ჩემთვის ეს ისეთივე ტკივილია, თუ არა უარესი, როგორიც არის მათთვის. პასუხისმგებლობას რა თქმა უნდა, არ გავურბივართ. ჯერ მიმდინარეობს გამოძიება. იმედი მაქვს, რომ ობიექტური იქნება გამოძიება, თუმცა მგონია, რომ ისე დაუმძიმეს ბრალი... ძალიან მძიმე იყო ეს ჩემთვის", - განაცხადა ქადაგიძემ და კითხვაზე, მართლა დაურეკა თუ არა მან გოგი თოფაძეს, უპასუხა, რომ დაურეკა ბოდიშის მოსახდელად და არა მოსალაპარაკებლად.

შედგა თუ არა საუბარი დაკავებულის დედასა და დაზარალებულის ოჯახს შორის, ამის გასარკვევად AMBEBI.GE გოგი თოფაძეს დაუკავშირდა.

ყოფილმა პარლამენტარმა დაადასტურა, რომ მისი შვილიშვილის საქმეში ბრალდებული ბუსა ჟვანიას დედამ, ნინო ქადაგიძემ მართლაც დაურეკა.

"ქალბატონმა ნინომ დამირეკა, მას რას ვერჩი... იმ დროს პოლიციაში ვიყავი და ჩემი დაკითხვა მიდიოდა. ვუთხარი, საღამოს დამირეკეთ, სახლში ვიქნები-მეთქი, ვიცნობ ამ ქალბატონს, რა უნდა ვუთხრა, რა უნდა ვქნა? პოლიციაში ის ვთქვი, რაც იყო. თუმცა მინდა გითხრათ, რომ სასჯელის ზომის ასე აწევა ჩემი სურვილი არ ყოფილა, არ წავალ ამაზე თანახმა. მეგონა, ბავშვი კვდებოდა, გამწარებული ვიყავი და რა მოხდა და რატომ გადაწყვიტეს, ეს უკვე არ ვიცი, არაა ჩემი ბრალი.

რა ვუქნა იმას, რაც ჩვენებაში მიწერია და რაზეც ორჯერ მომაწერინეს ხელი? პირველი 2 დღე გიჟად ვიყავი და ის დავწერე, რაც რეალურად ვიცოდი. ვიცნობ დედამისს, კაი ქალია, ტირის, მაგრამ რა ვქნა?

მე რაც პოლიციას ვუთხარი, ის არ ითვალისწინებს 15 წელს, მაქსიმუმ 3 თუ 4 წელს. ვნახავ იმ ქალბატონს, ავუხსნი ყველაფერს და რაც შემიძლია მხარს დავუჭერ, მეცოდება...

ისე, ის ბიჭი 2 დღის წინ რომ სადღაც მენახა, იქნება მომეკლა კიდეც, მაგრამ ახლა ლევანი უკეთესობისკენაა და სიფიცხემ გადამიარა. მთვრალი იყო ისიც, ჩემი შვილიშვილიც, იმას ის გოგო მოსწონდა, ჩემსას იმ ქალთან ურთიერთობა არ ჰქონია, მაგრამ ჟვანიას რა და როგორ მოეჩვენა, არ ვიცი. ყველანი, ვინც იქ იყვნენ, ლევანიკოს თანაკლასელები არიან, ის გოგონაც. შევხვდები დედამისს, დაველაპარაკები... რომ გავიგე 15 წელიო, შემეცოდა, კაცო, ის ბიჭი და დედამისი" - განაცხადა გოგი თოფაძე.

ცნობისთვის, ბესარიონ (ბუსა) ჟვანიას, რომელიც ბიზნესმენ გოგი თოფაძის შვილიშვილის, ლევან თოფაძის განზრახ მკვლელობის მცდელობის ბრალდებით დააკავეს, აღკვეთის ღონისძიების სახით პატიმრობა შეეფარდა.

აღნიშნული გადაწყვეტილება თბილისის საქალაქო სასამართლოს მოსამართლე ეკატერინე კუკულაშვილმა მიიღო.

დღევანდელ სასამართლო სხდომაზე ბრალდების მხარე ბუსა ჟვანიასთვის აღკვეთის ღონისძიების სახით პატიმრობის გამოყენებას, დაცვის მხარე კი მისი 50 000-ლარიანი გირაოს სანაცვლოდ გათავისუფლებას ითხოვდა.

ავტორი: ნანა ფიცხელაური