"ფოტოები გახმაურებისთვის არ დამიდია, უბრალოდ მენიშნა..." - რას ამბობს "ოცნების" დეპუტატი, რომელიც "ფეისბუქზე" პოსტის გამო გააშარჟეს

"ქართული ოცნების" დეპუტატი ჯუმბერ იზორია "ფეისბუქზე" გამოქვეყნებული პოსტის გამო "გააშარჟეს". კერძოდ, იზორიამ სოციალურ ქსელში გამოაქვეყნა ფოტოები, სადაც ის ვაშლის ხესთან არის გადაღებული.

"ჩემმა დარგულმა ვაშლმა, მე-3 წელს ასეთი ნაყოფი მოისხა" - წერს დეპუტატი ვაშლის ფოტოს კომენტირებისას. სავარაუდოდ აქცენტს დეპუტატი ხილზე არსებულ დაზიანებაზე აკეთებს, რომელსაც ჯვრის ფორმა აქვს. სწორედ აღნიშნულ ფაქტს გამოეხმაურა ინტერნეტმომხმარებლების ნაწილი და ბევრი მათგანი ოცნების დეპუტატის ამ პოსტმა ხუმრობის ხასიათზე დააყენა.

AMBEBI.GE ჯუმბერ იზორიას დაუკავშირდა:

- რაც იყო, ის დავდე. ვაშლის ნერგი ჩემს ეზოში, სახლის უკანა მხარეს სამი წლის წინ დავრგე. გუშინ ვნახე ნაყოფი და ჩავთვალე საჭიროდ, რომ დამედო. ბუნებასთან ურთიერთობა ძალიან მიყვარს.

გლეხის ოჯახში გავიზარდე, მუშაობას ვარ შეჩვეული. მიყვარს ყველაფერი, რაც ოჯახში შემოსავალს, ბარაქას ქმნის. ჩემს ეზოსაც მე ვუვლი, არასოდეს მეზარება. აღნიშნული ფოტოები გახმაურებისთვის არ დამიდია, უბრალოდ მენიშნა და გადავიღე. დავდე "ფეისბუქზე", არ ვიცი ვინ როგორ მიიღო. დიდება უფალს

ავტორი: თეონა რამაზაშვილი