''არსად წასვლას არ ვაპირებ, არანაირი თავშესაფარი არ მჭირდება... ეს თქვენ  დაგჭირდებათ გაქცევა მალე" - ბაჩალიაშვილის ოჯახის ადვოკატი ამბობს, რომ ემუქრებიან

დაუდგენელ ვითარებაში გარდაცვლილი 23 წლის პროგრამისტის, თამარ ბაჩალიაშვილის ოჯახის ადვოკატი, მიხეილ რამიშვილი აცხადებს, რომ მუქარის შეტყობინებების გამო საქართველოში აკრედიტირებულ საელჩოებს მიმართავს და ოჯახის წევრების დაცვას სთხოვს. რამიშვილმა განაცხადა, რომ "მესენჯერში" მუქარის შემცველ შეტყობინებებს იღებს.

"მთელი ეს პერიოდი ვისმენდი ლანძღვა-გინებას, რაც სოციალურ ქსელში მიმინარეობდა, ყველაფერს თავისი საზღვარი აქვს. ბოლო პერიოდში ჩემს "მესენჯერში" უკვე მუქარები წამოვიდა არა მარტო ჩემს, არამედ ჩემი ოჯახის წევრების მიმართ. ამ დღეებში ყველა ამ შეტყობინებას, არ ვიცი ეს ტროლები არიან თუ ვინ არიან, წარვუდგენ საელჩოებს, მოვითხოვ ყველა ამ შეტყობინების მისამართები დავადგინო. არ მივმართავ ხელისუფლებას და სამართალდამცავ ორგანოებს, რომ მათ დაადგინონ, რადგან მათ, არავის აბსოლუტურად, არ ვენდობი.

უკვე მოვითხოვ ჩემი ოჯახის წევრების მიმართ გარკვეული უსაფრთხოების ზომები გამოინახოს სხვა ქვეყანაში, მაგრამ ამ საქმეს ჩემი სიცოცხლის საპირწონედ გავაკეთებ და ბოლომდე მივიყვან. მთელ საელჩოებს მოვთხოვ, რომ ჩემი ოჯახის წევრები დაცული იყვნენ, იმიტომ, რომ ასეთი სიბინძურე, რასაც ესენი აკეთებენ, არ მინახია", – განაცხადა მიხეილ რამიშვილმა.

მისივე თქმით, საქმის პროკურორმა თამარ ბაჩალიაშვილის დედას, თეონა თამაზაშვილს გუშინ მასთან დაკავშირებით ისეთი კითხვები დაუსვა, რასაც საქმის გამოძიებასთან კავშირი არ აქვს.

"მე არსად წასვლას არ ვაპირებ, არანაირი თავშესაფარი არ მჭირდება... ეს თქვენ დაგჭირდებათ გაქცევა მალე. მე მინდა, რომ დაცული იყვნენ ჩემს სამშობლოში ჩემი ახლობლები და ჩემი შვილები ", - განაცხადა მან "ტვ პირველის" ეთერში.