"ჩვენთვის არასასიამოვნო შემთხვევა გამოვლინდა ქობულეთში... მინდა გავაფრთხილო ვიზიტორები" - პაატა იმნაძე

ქობულეთში კაფე "ჰავანას" თანამშრომელს კორონავირუსი დაუდგინდა. ამის შესახებ მთავრობის ადმინისტრაციაში გამართულ ბრიფინგზე დაავადებათა კონტროლის ეროვნული ცენტრის ხელმძღვანელის მოადგილემ პაატა იმნაძემ განაცხადა.

მისი თქმით, კაფეს ყველა თანამშრომელი იზოლაციაშია გადაყვანილი.

"ჩვენთვის არასასიამოვნო შემთხვევა გამოვლინდა ქობულეთში, კორონავირუსი დაუდგინდა ქალბატონს, რომელიც ჩასულია იქ თბილისიდან სამუშაოდ. მუშაობს კაფე "ჰავანაში" და იქ მომუშავე პერსონალი, ვინც თანამშრომელთან იყო კონტაქტში, იზოლაციაში არიან გადაყვანილი და მიმდინარეობს მათი კვლევა.

თუმცა 9-10-11 აგვისტოს ვინც იყვნენ ვიზიტორები, მინდა გავაფრთხილო, რომ ფრთხილად იყვნენ, თუ ოდნავ სიმპტომები გამოუვლინდათ, მიმართონ ცხელების ცენტრს" - განაცხადა იმნაძემ.

როგორც იმნაძე აღნიშნავს, გუშინ ქვეყნის მასშტაბით კორონავირუსის 6 ათასამდე ტესტი ჩატარდა და სულ ბოლო მონაცემებით, საქართველოში 300 ათასზე მეტი პისიარ ტესტია გაკეთებული.