"დანაშაული არ ჩაუდენია, სამართალდამცველებმა  კვალი წაშალეს" - ტყიბულში მომხდარი მკვლელობის საქმეზე დაკავებული მამაკაცის ახლობლები

ტყიბულში მომხდარი მკვლელობის საქმეზე დაკავებული მამაკაცის ახლობლები სამართალდამცველებს ადანაშაულებენ. მათ დღეს ქუთაისში ბრიფინგი გამართეს და მომხდარის შესახებ ისაუბრეს.

დაკავებულის მეუღლის ნინო მეფარიშვილის თქმით, მის ქმარს დანაშაული არ ჩაუდენია და უსაფუძვლოდ დააკავეს. ნინო მეფარიშვილი აცხადებს, რომ სამართალდამცველებმა ფაქტები და კვალი წაშალეს. მის მეუღლეს კი ბრალს დებენ ადამიანის მკვლელობაში, რომელსაც არ იცნობდა და არც შურისძიების მოტივი არ ამოძრავებდა.

ნინო მეფარიშვილის თქმით, შემთხვევის ადგილზე რამდენიმე ადამიანის სისხლის კვალი იყო, იყო ორმხრივი სროლა, თუმცა კვალის დაფარვის მიზნით წაიშალა. მისი თქმით, "მკვლელი პოლიციელები ცდილობენ დანაშაული დაფარონ და უდანაშაულო ადამიანები დააკავონ“.

დაკავებულის მეუღლე მიიჩნევს, რომ მას და მის ოჯახს საფრთხე ემუქრება.

დაკავებულის ახლობლები ასევე აცხადებენ, რომ როდესაც მოწმის სახით გამოკითხვაზე იყვნენ, ტყიბულის პოლიციაში მათზე იძალადეს.

ამასთან, შინაგან საქმეთა სამინისტროს ინფორმაციით, ტყიბულში 9 აგვისტოს მომხდარ განზრახ მკვლელობის ფაქტზე წარსულში ყაჩაღობისა და ძალადობისათვის ნასამართლევი - 1986 წელს დაბადებული ზ.ჩ დააკავეს.

"გამოძიებით დადგინდა, რომ ბრალდებულმა მიმდინარე წლის 9 აგვისტოს ტყიბულის რაიონის სოფელ ბზიაურის ტერიტორიაზე, ცენტრალურ საავტომობილო გზაზე, შურისძიების მოტივით, ავტომატური ცეცხლსასროლი იარაღიდან სიცოცხლისათვის სახიფათო დაზიანებები მიაყენა 1986 წელს დაბადებულ ზ.ს.-ს, რომელიც მიღებული დაზიანებების შედეგად საავადმყოფოში მიყვანისთანავე გარდაიცვალა.

სამართალდამცველებმა ბრალდებული ქუთაისში, მოსამართლის განჩინების საფუძველზე დააკავეს.

განზრახ მკვლელობისა და ცეცხლსასროლი იარაღის მართლსაწინააღმდეგო შეძენა, შენახვა, ტარების ფაქტზე გამოძიება სსკ-ის 108-ე და 236-ე მუხლის მე-4 ნაწილით მიმდინარეობს“, - ნათქვამია შსს-ს მიერ გავრცელებულ ინფორმაციაში.

ამავე თემაზე: "ეს მოხდა ჩასაფრებით, წინასწარ განზრახვით" - ვინ დააკავეს კუკა სოფრომაძის მკვლელობის ბრალდებით?