"რამდენი თამაზა დათვრება და "ბელაია" დაემართება, იმდენჯერ ასეთები უნდა ილაპარაკოს" - მირიან ნიკოლაძე ზ.ხ.-ს მამის განცხადებას პასუხობს

გარდაცვლილი ფეხბურთელის, გიორგი შაქარაშვილის ბიძა არასერიოზულს უწოდებს არასრულწლოვან ზ.ხ.-ს მამის თამაზ ხომასურიძის განცხადებას, რომ ერთ-ერთმა დაჯგუფებამ მას ნიკოლაძეზე ინფორმაცია მიწოდა.

ამის შესახებ ნიკოლაძემ AMBEBI.GE-სთან საუბრისას განაცხადა.

"სიმართლე გითხრათ, სერიოზულად არ აღვიქვამ მის მუქარებს. მგონია, რომ რამდენი თამაზა დათვრება და ბელაია დაემართება, იმდენჯერ ასეთი რამეები უნდა ილაპარაკოს.

მისი არსებობა მე ზოგადი პრობლემა უფრო მგონია, ვიდრე - ჩემი. რადგანაც უსაფრთხოების განცდას არღვევს საზოგადოებაში მისი ასეთი გამოსვლები. თუ დამნაშავეა, ჩასვან ციხეში, თუ ფსიქიკური პრობლემები აქვს, გადაიყვანონ შესაბამის დაწესებულებაში.

რადგან მე არ აღვიქვამ სერიოზულად მის მუქარებს, ეს იმას არ ნიშნავს, რომ მას არ შეუძლია რაიმე უკანონო ქმედება ჩაიდინოს. როგორც ვიცი, ჩხრეკაც ჩატარდა მის სახლში, დაკითხვაზეც ჰყავდათ, საგამოძიებო უწყებების გადასაწყვეტია რას მოიმოქმედებენ მის მიმართ" - ამბობს მირიან ნიკოლაძე.

ცნობისთვის, თამაზ ხომასურიძე შსს-ში დღეს გამოკითხვაზე იმყოფებოდა. როგორც თამაზ ხომასურიძემ უწყებაში შესვლამდე ჟურნალისტებს განუცხადა, ის გამოკითხვაზე დაბარებულია მის მიერ ერთ-ერთ სატელევიზიო ეთერში გაკეთებული განცხადების საფუძველზე.

კერძოდ კი, თამაზ ხომასურიძე ამბობს, რომ არსებობს დაჯგუფება "თეთრი ისარი", რომელმაც მას გიორგი შაქარაშვილის ბიძა მირიან ნიკოლაძესთან დაკავშირებით ინფორმაცია მიაწოდა, რომლის მიხედვითაც, "შაქარაშვილის ბიძას ფული აქვს აღებული".

"იციან, რომ რაღაც ინფორმაციას ვფლობ. შსს-ში დამიბარეს ჩემს მიერ სატელევიზიო ეთერში გუშინ გაკეთებული განცხადების საფუძველზე. მე ეთერში არ მითქვამს, რომ მირიან ნიკოლაძის ლიკვიდაციაა დაგეგმილი, ვთქვი, რომ განაჩენია გამოტანილი. მე ამ დაჯგუფების "თეთრი ისარი" ფანი ვარ... ჩემი სახლიდან ჩხრეკის შედეგად წაიღეს კომპიუტერი, ტელეფონი და საბუთები" - აღნიშნა ხომასურიძემ.