ედგარ ალან პოს იდუმალი ქორწინება 13 წლის ბიძაშვილზე და სიცოცხლის ბოლოს ქალებისგან უარყოფილი მწერალი -  მისტიკა რეალურ ცხოვრებაში

ედგარ ალან პოს ცხოვრება მისტიკური, უცნაური და დრამატული ისტორიებით იყო სავსე. ამბობენ, რომ თავისი ნაწარმოებებისთვის შთაგონებას თავისივე ცხოვრებიდან იღებდა, თუმცა რეალობა მოთხრობებში აღწერილზე უფრო რთული ყოფილა.

ედგარ ალან პოს პირველი წიგნის ასლი მწერლის გარდაცვალების შემდეგ, აუქციონზე 662 500 დოლარად გაიყიდა, თუმცა მისი სიცოცხლის პერიოდში, როდესაც წიგნი პირველად გამოვიდა, მან აღიარება ვერ მოიპოვა.

მისი მისტიკური და იდუმალებით მოცული ნაწარმოებების მიღმა მწერლის არანაკლებ იდუმალი ცხოვრება იმალება და თუ ედგარ ალან პოს ბიოგრაფიას გაეცნობით, აღმოაჩენთ, რომ მისი ცხოვრება ბევრი უჩვეულო დეტალით იყო სავსე.

• 12 წლამდე თავშესაფარში ცხოვრობდა

როცა ედგარ ალან პო დაიბადა, მამამ, დევიდმა ოჯახი მიატოვა, მწერლის დედა, ელიზა, რომელიც მსახიობი იყო, შვილის გაჩენიდან ერთ წელიწადში ტუბერკულოზით გარდაიცვალა, ქალის სიკვდილიდან სამ დღეში დევიდიც მოკვდა. რის შემდეგაც, მომავალი მწერალი თავშესაფარში წაიყვანეს.

ადრეულ წლებში მისი, როგორც მწერლისა და პოეტის კარიერა არ იყო წარმატებული და ამიტომაც, ჯარს შეუერთდა.

18 წლის ედგარ პო ფინანსურად რთულ მდგომარეობაში იყო მიუხედავად იმისა, რომ კლერკად და გაზეთში მწერლად მუშაობდა. მან ამ პერიოდში გამოაქვეყნა წიგნი Tamerlane and Other Poems, თუმცა ვერანაირი ყურადღება ვერ მიიპყრო. მალე ედგარ პო ჯარში წავიდა, სადაც მისი ხელფასი გაორმაგდა. მწერალმა ოფიცრის წოდების მოპოვებაც შეძლო.

• როდესაც 27 წლის გახდა, ის თავისსავე ბიძაშვილზე, ვირჯინია კლემზე დაქორწინდა. მაშინ გოგონა 13 წლის იყო.

ედგარ პო დეიდასთან, მარია კლემთან გადავიდა საცხოვრებლად. ამ პერიოდიდან, მისი ლიტერატურული კარიერა გარკვეულწილად უფრო სტაბილური გახდა. მუშაობდა გამომცემლობაში და ასევე გამოაქვეყნა რამდენიმე მოთხრობა. 1836 წელს მან საზოგადოებას თავის ბიძაშვილზე, ვირჯინია კლემზე ქორწინების შესახებ შეატყობინა, რომელიც იმ დროს 13 წლის იყო.

მწერლის ზოგიერთი ბიოგრაფი აღწერს, რომ წყვილს საოცარი რომანტიკული სიყვარული აკავშირებდა, ზოგიერთი კი მიუთითებს, რომ რეალურად ედგარსა და ვირჯინიას ერთმანეთთან და-ძმური სიყვარული ჰქონდათ, თუმცა ვერ ხსნიან რის გამო დაქორწინდა ბიძაშვილზე, თუ ის მხოლოდ დასავით უყვარდა. ამიტომაც ედგარ პოს ბიოგრაფიაში ეს კიდევ ერთ ამოუცნობ დეტალად რჩება.

ედგარ ალან პოს ბიოგრაფი, არტურ ჰობსონი წერს, რომ მწერალი ცოლს ასე მიმართავდა - "სის", რაც მომდინარეობდა სიტყვიდან sister (და). თუმცა ამასთანავე, სხვა ბიოგრაფები მიიჩნევენ, რომ მათ შორის ჩვეულებრივი ცოლ-ქმრული ურთიერთობა იყო და ალან პოს გაგიჟებით უყვარდა თავისი ბიძაშვილი.

გოგონა 24 წლის ასაკში ტუბერკულოზით გარდაიცვალა.

• იმედგაცრუებული მწერალი

The Raven/ყორანი ედგარ პოს ყველაზე პოპულარულ ლექსად მიიჩნევა და მისი გამოქვეყნების შემდეგ, 1845 წელს მწერალს მხოლოდ 9 დოლარი გადაუხადეს. ლექსის 1500 ეგზემპლარის გაყიდვის შემდეგ კი, ედგარ პომ 120 დოლარი გამოიმუშავა.

• სიცოცხლის უკანასკნელი ერთი წლის განმავლობაში ედგარ ალან პომ ხელი ორ ქალს სთხოვა

ედგარ ალან პოს სარა ელენი შეუყვარდა, რომელიც თავადაც ქვრივი პოეტი იყო. ისინი ერთმანეთს ლექსებს უძღვნიდნენ. ედგარმა მას ხელი სთხოვა, რაზეც თანხმობა მიიღო, თუმცა ნიშნობა ვერ შედგა და პოს ალკოჰოლზე დამოკიდებულების გამო, ქორწილი ჩაიშალა. ამის შემდეგ კი განაწყენებულ და იმედგაცრუებულ მწერალს ხელი ბავშვობის მეგობრისთვის სარა ელმირა როისტარისთვის უთხოვია, თუმცა არც მასზე დაქორწინებულა.

• მისტიკური გარდაცვალება

მწერალი 1849 წლის 7 ოქტომბერს, 40 წლის ასაკში, ბალტიმორში გარდაიცვალა, თუმცა გარდაცვალების მიზეზი დღემდე დაუდგენელია. სხვადასხვა წყაროები მწერლის გარდაცვალების სხვადასხვა მიზეზს ასახელებენ, მათ შორის: ალკოჰოლს, ტვინში სისხლჩაქცევას, ქოლერას, გულის ავადმყოფობას, ცოფს, თვითმკვლელობას, ტუბერკულოზს.