"არ შეხვიდეთ წყალში ნაბახუსევზე, არ დატოვოთ ბავშვები უყურადღებოდ..." - მაშველებმა 1 თვეში შავი ზღვის სანაპიროზე 170 ადამიანი გადაარჩინეს

აგვისტოს განმავლობაში, შავი ზღვის სანაპირო ზოლზე მაშველებმა 170 მოქალაქე გადაარჩინეს. საგანგებო სიტუაციების მართვის სამსახურის ინფორმაციით, აქედან 23 ადამიანი 4 - ბალიანი შტორმის დროს გადაარჩინეს. გადარჩენილებს შორის 48 არასრულწლოვანია.

ამასთან, მაშველებმა სანაპირო ზოლზე დაკარგული 38 ბავშვი იპოვნეს.

„შინაგან საქმეთა სამინისტროს საგანგებო სიტუაციების მართვის სამსახური მოგიწოდებთ, დაემორჩილოთ მაშველების მითითებებს. არ შეხვიდეთ წყალში შტორმის დროს. არ შეხვიდეთ წყალში არაფხიზელ მდგომარეობაში და ნაბახუსევზე. არ დატოვოთ ბავშვები უყურადღებოდ“, - ნათქვამია საგანგებო სიტუაციების მართვის სამსახურის ინფორმაციაში.