"რამდენიმე წუთის წინ თვითმფრინავის უცნაური დაშვება შევნიშნე..." - რატომ უხდის მოქალაქე მადლობას საპატრულო პოლიციასა და 112-ს?

მოქალაქე სიმონ ჩაჩანიძე სოციალურ ქსელში პოსტს აქვეყნებს, სადაც საპატრულო პოლიციისა და 112-ის თანამშრომლებს ყურადღებისა და სწრაფი რეაგირებისთვის მადლობას უხდის.

ის კონკრეტულ ფაქტს იხსენებს, როდესაც საკუთარი სახლის აივნიდან თვიმფრინავის უცნაური დაშვება შენიშნა და 112-ში დარეკა.

"მეამაყება ჩვენი საპატრულო პოლიცია !

რამდენიმე წუთის წინ თვითმფრინავის უცნაური დაშვება შევნიშნე აივნიდან ჰორიზონტზე, დავრეკე 112-ში და დავაფიქსირე ჩემი შეხედულება ნანახთან დაკავშირებით. სიტყვები არ მყოფნის იმ სიხარულის და აღფრთოვანების გამოსათქმელად, რა რეაგირებაც მოჰყვა საპატრულო პოლიციის მხრიდან ამ ყველაფერს.

წუთიც არ იყო გასული, რომ დამიკავშირდა საპატრულო პოლიციის ოცმეთაური და გამომკითხა დეტალურად რა დავინახე და როგორ, რამდენიმე წუთში სხვადასხვა პოლიციელმა დამირეკა სხვადასხვა ლოკაციიდან და დეტალურად განმიმარტეს, რომ აღნიშნულ ტერიტორიაზე ყველაფერი კარგად არის, რომ გადამოწმებულია ინფორმაცია ავიაციაში, რომ ცუდზე არაფერზე იფიქროთ, უშუალოდ პერიმეტრს ვათვალიერებთ, ყველაფერი რიგზეა და ა.შ........

აღარ ჩამოვთვლი. ამ ყველაფერს იცით რატომ ვწერ? სიამაყის განცდა მეუფლება როდესაც პოლიცილების მზრუნველობით და პროფესიონალიზმით სავსე სიტყვები და ინტონაცია მახსენდება.

დღეიდან სიხარულით დავრეკავ 112-ში, რადგანაც იმედი ჩამესახა, დავრწმუნდი, მჯერა უდიდესი ყურადღებით და მაღალი პროფესიონალიზმით მოახდენს რეაგირებას საპატრულო პოლიცია ნებისმიერ საკითხთან მიმართებაში, უსწრაფესად და რაც მთავარია, საოცრად დახვეწილი ფორმით. კიდევ ერთხელ უდიდესი მადლობა" - წერს ჩაჩანიძე.