რომის პაპი: "ჭამა და სექსი ღვთის მიერ გამოგზავნილი ღვთიური სიამოვნებებია"

ერთ-ერთ ინტერვიუში იტალიელ მწერალთან, კარლო პეტრინისთან, რომელმაც თავისი ახალი წიგნისთვის რომის პაპთან რამდენიმე საუბარი ჩაიწერა, პაპმა ფრანცისკემ სექსისა და საკვების შესახებ ისაუბრა და მათ "ღვთის საჩუქარი" უწოდა, მეტიც - მისი თქმით, მათით ტკბობა სულაც არაა ცოდვა, როგორც "მეტისმეტად გულმოდგინე" ეკლესიის ლიდერები წარსულში ასწავლიდნენ.

"სიამოვნება პირდაპირ ღვთისგან მოდის. ის არც კათოლიკურია, არც ქრისტიანული, არც რაიმე სხვა; ის უბრალოდ, ღვთიურია", - ამბობს პაპი პეტრინის წიგნში: "TerraFutura: საუბრები პაპ ფრანცისკესთან ინტეგრალურ ეკოლოგიაზე - "ჭამის და სექსის სიამოვნება ღვთისგან მოდის".

Insider-ის ინფორმაციით, ფრანცისკე ამ სიამოვნებებს წარსულში ეკლესიის მხრიდან "ზედმეტად გულმოდგინე მორალურობის მსხვერპლებს" უწოდებს და აღნიშნავს, რომ ეს "ქრისტიანული გზავნილის არასწორი ინტერპრეტაციაა":

"ჭამის სიამოვნება არსებობს იმისთვის, რომ კვებით ჯანმრთელობა შენარჩუნდეს, სექსუალური სიამოვნება კი იმისთვისაა, რომ სიყვარული კიდევ უფრო გაალამაზოს და სახეობათა გადარჩენა უზრუნველყოს", - განაცხადა პონტიფიკოსმა.

83 წლის პაპის თქმით, შეხედულებებმა, რომლებიც ცხოვრების ამგვარი ძირითადი ასპექტების დაგმობას და განდევნას უწყობს ხელს, "უზარმაზარი ზიანი გამოიწვია, რაც დღესაც ძლიერად იგრძნობა".

პაპს ნათქვამი აქვს, რომ სალოცავად ბევრად დიდი საკითხები არსებობს, როგორიცაა კლიმატის ცვლილება, ტყეების განადგურება და რესურსების არამდგრადი მოხმარება.

წიგნის ავტორის, კარლო პეტრინის თქმით, მისი ახალი წიგნი პაპის მიერ კლიმატის ცვლილებასთან ბრძოლის შესახებ გაკეთებულ მოწოდებას ეხმიანება. წყარო