ოქსფორდის უნივერსიტეტი ვაქცინის გამოცდას განაახლებს - რა გვერდითი მოვლენა გამოუვლინდა ერთ-ერთ მოხალისეს, რის მერეც გამოცდა შეჩერდა

COVID-19-ის საწინააღმდეგო ვაქცინის გამოცდები, რომელსაც AstraZeneca და ოქსფორდის უნივერსიტეტი ატარებდნენ, BBC-ის ცნობით, განახლდება. აღნიშნული ვაქცინის კვლევა მას შემდეგ შეჩერდა, რაც გაერთიანებულ სამეფოში პაციენტს გვერდითი ეფექტი გამოუვლინდა.

სამშაბათს, AstraZeneca-ს ცნობით, ვაქცინის კვლევები შეჩერდა, სანამ გაირკვეოდა, გვერდითი ეფექტი უშუალოდ მასთან იყო დაკავშირებული თუ არა. თუმცა, შაბათს ოქსფორდის უნივერსიტეტში განაცხადეს, რომ ვაქცინის ტესტირების გაგრძელება უსაფრთხოდ იქნა მიჩნეული.

აღნიშნული ვაქცინა, სხვა ათეულობით ვაქცინას შორის, საკმაოდ ძლიერ პრეტენდენტად ითვლება.

ოქსფორდის უნივერსიტეტის განცხადებაში ეწერა, რომ ასეთ დიდ კვლევაში "მოსალოდნელი იყო, რომ ზოგი მონაწილე ცუდად გახდებოდა".

მთავრობის მთავარმა სამეცნიერო მრჩეველმა, სერ პატრიკ ვალანსმა ეს მოსაზრება გაიმეორა და ოთხშაბათს, დაუნინგ სტრიტზე გამართულ პრესკონფერენციაზე აღნიშნა, რომ რაც ოქსფორდის კვლევაში მოხდა, უჩვეულო არაა.

უნივერსიტეტმა დასძინა, რომ უსაფრთხოების დამოუკიდებელი შემმოწმებელი კომიტეტისა და ბრიტანეთის მარეგულირებლის, მედიკამენტებისა და ჯანდაცვის პროდუქტების მარეგულირებელი სააგენტოს რეკომენდაციების შესაბამისად, ცდების განახლება უკვე შეიძლება.

ჯანდაცვის მდივანი, მეტ ჰენკოკი Twitter-ზე ვაქცინის გამოცდის გაგრძელებას მიესალმა და დაწერა: "ეს პაუზა აჩვენებს, რომ ჩვენ ყოველთვის უსაფრთხოებას ვაყენებთ ყველაფერზე წინ. ჩვენს მეცნიერებს მხარს დავუჭერთ, რომ ქმედითი ვაქცინა რაც შეიძლება უსაფრთხოდ და მალე შექმნან".

ოქსფორდის უნივერსიტეტი პაციენტის დაავადების შესახებ ინფორმაციას კონფიდენციალურობასთან დაკავშირებული მიზეზების გამო არ ამხელს, თუმცა New York Times-ის ცნობით, მოხალისეს განივი მიელიტის დიაგნოზი დაუსვეს, - ანთებითი სინდრომის, რომლიც ზურგის ტვინზე ახდენს გავლენას და რომელსაც ვირუსული ინფექციები იწვევს.

აღნიშნულ ვაქცინაზე პირველი და მეორე ფაზის ტესტირებების წარმატებით ჩატარების შემდეგ მყარდებოდა იმედები, რომ შეიძლება, სწორედ ის გამოჩენილიყო ერთ-ერთი პირველი ბაზარზე.

ბოლო კვირებში, მესამე ფაზაზე გადასვლის შემდეგ, ამერიკის შეერთებულ შტატებში, გაერთიანებულ სამეფოში, ბრაზილიასა და სამხრეთ აფრიკაში ვაქცინის ტესტირებაში დაახლოებით 30 000 მონაწილე იყო ჩართული. ვაქცინების კვლევის მესამე ფაზა ხშირად ათასობით მონაწილეს მოიცავს და შეიძლება, წლების განმავლობაში გაგრძელდეს.

ჯანდაცვის მსოფლიო ორგანიზაციის ცნობით, მსოფლიო მასშტაბით უკვე დაახლოებით 180 ვაქცინის კანდიდატია შემოწმებული, თუმცა ჯერ არც ერთის კლინიკური კვლევები არ დასრულებულა.

ოფიციალური მონაცემებით, შაბათს ბრიტანეთში კორონავირუსი 3 497 ადამიანს დაუდასტურდა. ეს ზედიზედ მეორე დღეა, რაც ინფიცირების შემთხვევათა რაოდენობამ 3 000-ს გადააჭარბა. მთლიანობაში, დადასტურებული შემთხვევების რაოდენობა 365 174-მდე აღწევს, გარდაცვლილთა რაოდენობა კი 41 623-ია.

ახალი შეზღუდვები ვირუსის გავრცელების მატების გაჩერებას ითვალისწინებს და ძალაში ორშაბათიდან უნდა შევიდეს. ინგლისში ექვსზე მეტი ადამიანის შიდა და გარე შეკრება შეიზღუდება, გარკვეული გამონაკლისების გარდა, როგორიცაა სამსახური თუ სკოლა; შოტლანდიაშიც 6-ზე მეტი ადამიანის შიდა და გარე თავშეყრა აიკრძალება, თუმცა ინგლისისგან განსხვავებით, ერთად მყოფი ადამიანები შეიძლება, ორი ოჯახიდან იყვნენ, ხოლო 12 წლამდე ასაკის ბავშვები შეზღუდვისგან თავისუფლები იქნებიან; უელსში ასევე 6-ზე მეტი ადამიანის შიდა შეკრება იქნება აკრძალული, თუმცა გარეთ მაქსიმუმ 30 ადამიანის თავშეყრა დაიშვება; ლოკალიზებული შეზღუდვები დაიწყებს მოქმედებას ჩრდილოეთ ირლანდიის ზოგიერთ ნაწილშიც. წყარო