კორონავირუსი საერთო ჯამში "ენგურჰესის" 50-მდე თანამშრომელს დაუდგინდა

„ენგურჰესის“ 50-მდე თანამშრომელს კორონავირუსი დაუდასტურდა. ამის შესახებ „ენგურჰესის“ მმართველი საბჭოს ხელმძღვანელმა ლევან მებონიამ განაცხადა.

მისი თქმით, თავდაპირველად 4 თანამშრომელი დაინფიცირდა, შემდეგ 28 და 16, რომელთაგან ყველა სოფელ საბერიოს მცხოვრებია, ერთი კი ზუგდიდის.

მებონიას ინფორმაციით, ცოტა ხნის წინ, სოფელში ტესტირება ერთ ქალს ჩაუტარეს, რომელსაც ვირუსი დაუდასტურდა. კონტაქტების ძიების დროს „ენგურჰესის“ თანამშრომლებიც შეამოწმეს.

მისივე ცნობით, ავადმყოფობა უსიმპტომოდ მიმდინარეობს და ყველა დაინფიცირებული თავს კარგად გრძნობს. მიუხედავად ამისა, ყველა მათგანი ზუგდიდისა და ანაკლიის საავადმყოფოებში იმყოფება.