"ბუზები აღმოვაჩინე თამარის მანქანაში, ასეთივე ვნახე ვილა "ალგეთში" - რას ამბობს ბაჩალიაშვილის მამა "ბუზების ექსპერიმენტზე", რომელიც დღეს ჩატარდება

23 წლის თამარ ბაჩალიაშვილის საქმის მიმდინარეობის ფარგლებში ქვემო ქართლის პოლიციაში დღეს "ბუზების ექსპერიმენტს" ჩაატარებენ, რომელსაც გარდაცვლილი პროგრამისტის მამა დაესწრება.

ჯუმბერ ბაჩალიაშვილი, რომელიც რამდენიმე დღის წინ საკალმახე "ალგეთში" იმყოფებოდა, ამბობს, რომ იქ იგივე სახის სპეციფიური "ბუზები" ნახა, რაც - ცხედარზე.

ის ვარაუდობს, რომ მისი შვილის ცხედარი მანამ, სანამ მაწევანის ტყეში იპოვიდნენ, საკალმახე, ვილა "ალგეთში" ჰყავდათ დასვენებული.

"ბუზები აღმოვაჩინე მანქანაში. მსხვილი ბუზები იყო, მსგავსი ბუზები ვნახე აქაც. ოთახში სანამ შევდიოდი, კარებთან ვნახე ასეთი ბუზები, მაშინვე ვუთხარი ადვოკატს, ასეთი ბუზებია, როგორც მანქანაშიო.

ექსპერტიზა მე არ მომითხოვია. ესენი თვითონ წელავენ, ზღაპრულ სცენას ქმნიან და დროს კლავენ. რაც საჭიროა, მკვლელის პოვნა იმას არ ეძებენ" - ამბობს ჯუმბერ ბაჩალიაშვილი.

ცნობისთვის, თამარ ბაჩალიაშვილი 18 ივლისს გაუჩინარდა. ის 5-დღიანი ძებნის შემდეგ თეთრიწყაროს ტყესთან, საკუთარ მანქანაში გარდაცვლილი იპოვეს. ბაჩალიაშვილის საქმეზე გამოძიება თავისუფლების უკანონო აღკვეთის მუხლით დაიწყო, შემდეგ კი ბრალდების კვალიფიკაციას თვითმკვლელობამდე მიყვანის მუხლი დაემატა.