ავტორი:

"ეს თუ მკვლელობაა, მაშინ რა ფოტოც არ უნდა იყოს, ეს როგორ გააბათილებს მის ვერსიას?" - რას პასუხობს ბაჩალიაშვილის დედას საქმის პროკურორი

"ეს თუ მკვლელობაა, მაშინ რა ფოტოც არ უნდა იყოს, ეს როგორ გააბათილებს მის ვერსიას?" - რას პასუხობს  ბაჩალიაშვილის დედას საქმის პროკურორი

23 სექტემბერს, გენერალურ პროკურატურაში, მედიის წარმომდგენლებისთვის თამარ ბაჩალიაშვილის მიერ გადაღებული ვიდეოჩანაწერები გასაჯაროვდა. ამის შემდეგ, საქმის პროკურორმა ამირან გულუაშვილმა ჟურნალისტების შეკითხვებს უპასუხა. პროკურორის თქმით, აღნიშნული ჩანაწერები თვეების წინანდელია და ზოგიერთი მათგანი თებერვლით თარიღდება. როგორც გაირკვა, საქმეში არ დევს და არც არსებობს გარდაცვალების წინ ჩაწერილი ვიდეოჩანაწერი. საქმის პროკურორმა ჟურნალისტების კითხვაზე, ოჯახის წევრებმა დააყენეს თუ არა ეჭვქვეშ ამ ჩანაწერების ავთენტურობა, განმარტა, რომ მათ ავთენტურობაზე საკითხი არ დაუსვამთ.

"მშობლებიც და ადვოკატებიც ამბობდნენ, რომ ისინი წინააღმდეგნი იყვნენ ამ ჩანაწერების გასაჯაროების, იმას არ ამბობდნენ, რომ ეს არ იყო თამარის ჩანაწერები. ერთია, რაც დაგვხვდა და მეორე - ექსპერტიზის შედეგად ყველა ჩანაწერი და მიმოწერა აღდგენილია. ეს ცოტა სენსიტიური საკითხიცაა და მათ ამიტომ არ ვასაჯაროვებთ. დრო და დრო რაღაც მოცემულობები გასაჯაროვდება, რის შესაძლებლობაც გვექნება საქმის ინტერესიდან გამომდინარე".

დადებს თუ არა პროკურატურა ფურცხვანიძის მიერ წარმოდგენილი ყალბი მასალების საპირწონედ სატელიტურ ფოტოებს, რითიც საბოლოოდ გაქარწყლდება ოჯახის ეჭვი თამარ ბაჩალიაშვილის მკვლელობის ვერსიაზე, ამირან გულუაშვილი პასუხობს, რომ უწყებამ ამ თხოვნით რამდენიმე ქვეყანას და ორგანიზაციას მიმართა:

"ჩვენ ბევრ ქვეყანას და ორგანიზაციას მივმართეთ თხოვნით. ზოგიერთისგან იყო პასუხი, რომ ეს არ იყო მათი ინტერესის სფერო. მაწევანის ტყეში ისეთი განსაკუთრებული არაფერი ხდება, უცხო ქვეყნის თანამგზავრი ამით რომ დაინტერესდეს. ზოგი ამბობს, რომ დედამიწის ის ნაწილი იმ პერიოდში ჩვენს რაკურსში არ შემოდიოდაო, ზოგიც - გვაქვს შორი კადრები, მაგრამ არაინფორმატიულია და არაფრის გარჩევა არ შეიძლებაო. ნაწილიდან უარყოფითი პასუხები მივიღეთ, ნაწილიდან ჯერ არ მოსულა პასუხი და იმედი გვაქვს, რომელიმედან საინტერესო მოცემულობას მივიღებთ".

კითხვაზე, მიმართა თუ არა პროკურატურამ ნასას სატელიტური ფოტომასალის გამოთხოვის თაობაზე, ამირან გულუაშვილმა განმარტა:

"ზოგადად მხოლოდ თანამგზავრის მიერ კონკრეტული ტერიტორიის გადაღება საკმარისი არ არის. გუგლის თანამგზავრი იქნება, თუ - ნასასი, ყველას თავისი დანიშნულება აქვს, ტყუილად მას არავინ გაუშვებს, თავის ფუნქციას თუ არ ახორციელებს. ბოდიში, მაგრამ მაწევანის ტყის შესწავლა სხვა ქვეყნების კომპეტენციაში არ შედის. თუ ვინმემ სპეციალურად არ დაზუმა და არ მიაახლოვა ის ტერიტორია, ინფორმატიული კადრი არ გამოდის. ჩვენ გვინდა იმდენად მიახლოვებული კადრი, რომ იქ ობიექტების გარჩევა, ამ შემთხვევაში - მანქანის გარჩევა იყოს შესაძლებელი, თორემ ზოგადად გლობუსი, სადღაც შორიდან გადაღებული ფოტო აბსოლუტურად არაინფორმატიულია".

პროკურორმა თამუნას დედას, თეონა თამაზაშვილსაც უპასუხა, რომელმაც გუშინ განაცხადა, რომ იმ შემთხვევაში დაიჯერებს მისი შვილის თვითმკვლელობის ვერსიას, თუ პროკურატურა სატელიტის ფოტოს დადებს, სადაც თამუნას ავტომანქანა 18-22 ივლისს მაწევანის ტყეში იქნება დაფიქსირებული:

"ჩვენ ბოლო პერიოდში ვისმენთ მოცემულობას, რომ ოჯახი და ადვოკატები დარწმუნებულნი არიან, რომ აქ არის ორგანიზებული ჯგუფის მიერ განხორციელებული მკვლელობა ხან საკალმახესთან, ხან - "ვილა ალგეთთან"... დედის განცხადება, სადაც ამბობს, რომ თუ იქნება სატელიტის ფოტოები, თვითმკვლელობას მაშინ დავიჯერებო, პირდაპირ კითხვის ნიშნის ქვეშ აყენებს ამ ვერსიების ლოგიკურობას. როგორ შეიძლება დედის პოზიცია რამე ფორმით ამყარებდეს იმ ვერსიებს, რაც აქამდე ადვოკატსაც ჰქონდა წარმოდგენილი? ადვოკატი მტკიცებით ფორმაში ამბობს, რომ დარწმუნებულია, მანქანა იქ არ იდგა და გოგონა მოკლეს. მისი ეს პოზიცია ჯერ კიდევ მაშინ დაფიქსირდა, როდესაც პირდაპირ ეთერში უჩვენებდნენ მანქანიდან ცხედრის გადმოსვენების კადრებს. პირველი მნიშვნელოვანი საგამოძიებო მოქმედებაც კი არ იყო დასრულებული, როცა მან კატეგორიულად განაცხადა, რომ ადგილი ჰქონდა მკვლელობას და ყველა მისი შემდგომი ნაბიჯი ამ პირველი ვერსიის შესაბამისად გრძელდება. დედის ეს განცხადება, ჩემი აზრით, კითხვის ნიშნის ქვეშ აყენებს ადვოკატის პოზიციას, რომ ეს უეჭველი მკვლელობაა. ეს თუ მკვლელობაა, მაშინ რა ფოტოც არ უნდა იყოს, ეს როგორ გააბათილებს მის ვერსიას? ადვოკატის პოზიცია დამაჯერებელი და მყარი რომ იყოს, მაშინ ის ვერც ერთ მტკიცებულებას ვერ მიიღებს სარწმუნოდ. თავიდანვე უნდა იყოს ობიექტური მიდგომა, ჭეშმარიტების დადგენაზე თუ ვსაუბრობთ".

პროკურორი ასევე არ ეთანხმება ადვოკატის მოსაზრებას, რომ გამოძიება თავიდანვე მხოლოდ თვითმკვლელობის ვერსიაზე მუშაობს.

"ნებისმიერი საგამოძიებო მოქმედებები ჩვენის მხრიდან ყველა მიმართულებით ტარდებოდა. მაშინ გვითხრას ადვოკატმა, რას არ ვაკეთებთ, რაზე ვხუჭავთ თვალს და რა მიმართულებით ვიკავებთ თავს. საგამოძიებო მოქმედებები კვლავ გრძელდება და საქმის დახურვაზე ჯერ ლაპარაკი არ არის. სამუშაოების ძირითადი ნაწილი დასრულებულია, თუმცა შესაძლოა კიდევ გამოიკვეთოს რამე ახალი გარემოება და კიდევ 70 ტომი საგამოძიებო მოქმედებები იყოს ჩატარებული. მეორე მიმართულებაა სატელიტები, რაზეც გრძელდება მუშაობა, რომელზეც გამოძიება ცალკე წარმოებად არის გამოყოფილი", - ამბობს გულუაშვილი.

რაც შეეხება დავით ფურცხვანიძისა და მიხეილ რამიშვილის ეპიზოდს, პროკურორის თქმით, მტკიცებულებების ფალსიფიკაციის მუხლით აღძრული სს საქმე ცალკე წარმოებად არის გამოყოფილი.

"რამიშვილის ტელეფონის გახსნა, დათვალიერება, ექსპერტიზა ადვოკატის თანხმობით მოხდა. გამოძიებისთვის მობილურში მისი სხვა მონაცემები არ არის საინტერესო, გარდა ფურცხვანიძესთან კომუნიკაციისა, რომელიც ეხება მტკიცებულებების ფალსიფიკაციის ეპიზოდს. არსად ჩვენ არ გვითქვამს, რომ რამიშვილს ვიჭერთ. ის მოცემულობა, რაც ფოტოსურათების თემას უკავშირდება, ობიექტურად აჩენს ეჭვებს. თქვენ რომ გამომძიებლები იყოთ, არ გაგიჩნდებოდათ ეჭვი, რომ შესაძლოა რამიშვილი მონაწილეობს ამ დანაშაულებრივ სქემაში და არ გადაამოწმებდით ამ მიმართულებით, რამიშვილის ტელეფონით არ დაინტერესდებოდით? დამტკიცებულია, რომ ეს ფოტოსურათები არის გაყალბებული, ფურცხვანიძე ამბობს ალტერნატიულ ექსპერტიზას ჩავატარებ ამერიკაში, ასევე, სხვა ფოტომასალას წარმოვადგენო. კი, ბატონო, ჩაატაროს ექსპერტიზაც და ფოტოებიც მოიტანოს ამერიკიდან თუ ჩინეთიდან, ოღონდ ავთენტური მასალა".

უცხო ქვეყნისათვის საქართველოს ტერიტორიის ნაწილის გადაცემისკენ მიმართული მოქმედების განხორციელების ფაქტზე გამოძიება მიმდინარეობს

"შვილი მომიკლა და ახლა მემუქრება, ბავშვებს არ განახებ, თუ არ დამეხმარები, ციხიდან გამოსვლაშიო" - ხაშურში მომხდარი შემზარავი მკვლელობის ახალი დეტალები

პროკურორის განცხადებით, გიორგი ლუბარეცს "ვილა ალგეთის“ ტერიტორიაზე ინფორმაცია თამარ ბაჩალიაშვილის გაუჩინარებიდან 4 დღის შემდეგ ჰქონდა გადამოწმებული