"საქართველოში, საზღვართან მდებარე სოფლებში მცხოვრები სომხები თურქულნომრიან სატვირთოების მძღოლებს ემუქრებიან" - რას წერს თურქული გამოცემა?

თურქულ გაზეთ "დეილი საბაჰში" («Daily Sabah») დაბეჭდილია სტატია, სათაურით "აქტაშ/ჩილდირის სასაზღვრო გასასვლელი საქართველოსთან დახურულია: სომხები თურქულ ავტომანქანებს ემუქრებიან". მასში ნათქვამია, რომ თურქეთის არდაჰანის (არტაანის) პროვინციაში მდებარე აქტაშ-ჩილდირის საკონტროლო-გასასვლელი პუნქტი, რომელიც თურქეთ-საქართველოს საზღვარზე მდებარეობს, დროებით დახურულია.

გთავაზობთ სტატიის შემოკლებულ ვერსიას:

"საქმე იმაშია, რომ საქართველოში, საზღვართან ახლოს მდებარე სოფლებში მცხოვრები სომხები თურქულნომრებიან სატვირთო ავტომანქანების მძღოლებს აბუჩად იგდებენ და ემუქრებიან. თურქი მძღოლების დევნა აზერბაიჯანისა და სომხეთს შორის მიმდინარე ომის ფონზე დაიწყო, რომელშიც თურქეთმა ღიად გამოხატა სოლიდარობა აზერბაიჯანის მიმართ - ბაქო სომხების მიერ ოკუპირებული ტერიტორიების დაბრუნებას ცდილობს.

შექმნილი ვითარების გამო ტრანპორტის ნაკადი სხვა ორი სასაზღვრო გასავლელისაკენ გადამისამართდა, თუმცა ამჟამად იმ პუნქტებშიც, განსაკუთრებით სარფში, რთული სიტუაცია შეიქმნა - აქ არსებული ავტოტრაილერების რიგი თითქმის 15 კილომეტრს აღწევს.

"უკვე ორი დღეა ველოდები და არ ვიცი, კიდევ რამდენ ხანს მომიწევს აქ დგომა", - ამბობს მძღოლი რეჯეფ კირიჩარსლანი, რომელიც სარფთან ახლოსაა გაჩერებული. კიდევ ერთი მძღოლი სელიმ ექში განმარტავს, თუ როგორ მოხვდა სარფთან ახლოს: "ჩემმა მეგობრებმა მითხრეს, რომ აქტაშის გავლით საქართველოში არ წახვიდე, ადგილობრივი მცხოვრებლები - სომხები ჩვენს მიმართ მტრულად არიან განწყობილიო".

რასაკვირველია, მძღოლები უკმაყოფილონი არიან რიგში დგომით, რაც მართლაც არასასიამოვნოა, მაგრამ გრძელმა რიგმა "მედლის მეორე მხარეც" აჩვენა - ის, თუ რამდენად დიდია თურქეთის საგარეო ვაჭრობის მოცულობა.

"მართალი გითხრათ, როცა სატვირთო ავტომანქანების ესოდენ გრძელ რიგს ვხედავ, თავს ბედნიერად ვგრძნობ. ეს ნიშნავს, რომ ჩვენ ვმუშაობთ და ექსპორტი გრძელდება, რომელსაც ხელს ვერც პანდემია და ვერც შეიარაღებული კონფლიქტი ვერ უშლის", - ამბობს ოსმან აქიურეკი, ხოფის სავაჭრო სამრეწველო პალატის ხელმძღვანელი. როგორც იგი აღნიშნავს, სარფის სასაზღვრო-საკონტროლო პუნქტის გავლით, თურქეთიდან საქართველოში ყოველდღიურად 650-მდე სატვირთო ავტომანქანა შედის, საქართველოდან თურქეთში კი - 550. პანდემიამდე ეს ციფრი 400-450-მდე მერყეობდა. მთლიანობაში თურქეთმა მიმდინარე წელს ექსპორტი თითქმის 30%-ით გაზარდა, გასული წლის ანალოგიურ პერიოდთან შედარებით", - ხაზს უსვამს ოსმან აქიურეკი. წყარო

ავტორი: სიმონ კილაძე