"გავრცელებული კადრები ძველია... ტანსაცმელი, რომელიც ამ კადრებში აცვია, აქ არის, სახლში" - რას აცხადებს ბადრი ესებუას ოჯახი (ფოტოები)

„საქართველოს ბანკზე" თავდასხმაში ბრალდებულის ბადრი ესებუას ოჯახი აცხადებს, რომ დღეს მედიით გავრცელებული კადრები, თითქოს ბადრი ესებუა ერთ-ერთი ქალაქის ქუჩაზე გადაადგილდება, ძველია. მას შემდეგ, რაც ბადრი ესებუას მამა, ტარიელ ესებუა მედიით გაეცნო გავრცელებულ კადრებს ჟურნალისტებთან განმარტებების გაკეთება მოისურვა. ტარიელ ესებუამ ჟურნალისტებს თვალსაჩინოებისთვის წარმოუდგინა ის ტანსაცმელი და ფეხსაცმელი, რომელიც მის შვილს, ბადრი ესებუას კადრებში აცვია.

„შეადარეთ, მოდით ეს მაისური ხომ არის? თუ 2 დღის წინ ეს ტანსაცმელი ეცვა, მაშინ ეს ტანსაცმელი აქ არის (სახლში)“, - განაცხადა ტარიელ ესებუამ.

შეგახსენებთ, შინაგან საქმეთა სამინისტრომ დაადასტურა, რომ 21 ოქტომბერს ზუგდიდში, „საქართველოს ბანკის“ ფილიალზე მომხდარი თავდასხმა ბადრი ესებუამ განახორციელა. გამოძიება საქართველოს სისხლის სამართლის კოდექსის 236-ე, 323-ე და 329-ე მუხლებით მიმდინარეობს, რაც ტერორისტულ აქტს, მძევლად ხელში ჩაგდებას ტერორისტული მიზნით და ცეცხლსასროლი იარაღის უკანონოდ შეძენა-შენახვა-ტარებას გულისხმობს.