ერთად შეკრებილი ათასობით ადამიანი უხანში - როგორ იზეიმეს ჰელოუინი ქალაქში, საიდანაც კორონავირუსი გავრცელდა

მაშინ, როცა მსოფლიოს უმეტეს ქვეყანაში კორონავირუსის მეორე ტალღას ებრძვიან, ინფიცირებულთა რაოდენობა კი რეკორდულად იზრდება, ჩინეთის ქალაქ უხანში, საიდანაც ყველაფერი დაიწყო, აკრძალვები აღარ მოქმედებს, მცირე რაოდენობით ვლინდება ვირუსის ახალი შემთხვევები და ადამიანები ჩვეული ცხოვრებით ცხოვრობენ.

უხანის მაცხოვრებლებმა ჰელოუინი აღნიშნეს, ათასობით ადამიანი ქალაქის მთავარ პარკში შეგროვდა, სადაც ჰელოუინისადმი მიძღვნილი ღონისძიება გაიმართა.

მათ ნაწილს პირბადე ეკეთა, ხოლო ნაწილიც პირბადის გარეშე იყო. მედიაში კი ვრცელდება ფოტოები, სადაც აღბეჭდილია, თუ როგორ ზეიმობენ ადგილობრივები ჰელოუინს.

აღსანიშნავია, რომ ჩინეთი ინფიცირებულთა რაოდენობის მიხედვით ამ დროისთვის მსოფლიოს 56-ე ქვეყანაა და ბოლო მონაცემებით, ვირუსის გამოვლენის დღიდან ამ დრომდე იქ 85 940 შემთხვევაა აღწერილი, გარდაიცვალა 4 634 ადამიანი, ხოლო 80 967 პაციენტი გამოჯანმრთელდა. ამ დროისთვის ქვეყანაში კორონავირუსის 339 აქტიური შემთხვევა აქვთ.