"მწყინს "ევროპული საქართველოს" შედეგი..." - როგორ ეხმაურება არჩევნების შედეგებს თამარ ჩერგოლეიშვილი

"ტაბულას" რედაქტორი თამარ ჩერგოლეიშვილი საპარლამენტო არჩევნების შედეგებს "ფეისბუქის" პირად გვერდზე ეხმაურება:

"თბილისში მოვდივარ - ეს ხედი მაგრად მომენატრება.

მწყინს "ევროპული საქართველოს" შედეგი, მაგრამ კანონზომიერი ახსნა აქვს ამ ყველაფერს და რისი ახსნაც შეგიძლია, ის შეიძლება იოლად შეცვალო. პარტიამ ეროვნულზე მაღალი შედეგი მიიღო ამ ოლქში. გიგამ - პარტიაზე მაღალი. მუშაობას აზრი აქვს. როგორც უკვე არაერთხელ ვთქვი - ამ ოლქს ჩვენ არ შევეშვებით, არც იმ ადამიანებს დავივიწყებთ, ვინც მხარი დაგვიჭირა. დანარჩენი - ვნახოთ. მოკლედ, მადლობა ყველას, ვინც ამ პროცესში გვერდზე გვედგა", - წერს ჩერგოლეიშვილი.

ცნობისთვის, ცენტრალური საარჩევნო კომისიის მიერ დათვლილი 13 უბნის მონაცემების მიხედვით, ფოთში, ხობსა და სენაკში „ქართული ოცნების“ კანდიდატი ლიდერობს. კერძოდ, ამ დროის მონაცემებით, მმართველი გუნდის კანდიდატს, ირაკლი ხახუბიას 52,73 %-იანი მხარდაჭერა აქვს. მეორე ადგილზეა „ნაციონალური მოძრაობის“ კანდიდატი მურთაზ ზოდელავა, რომელსაც 26,39 % უჭერს მხარს. რაც შეეხება „ევროპული საქართველოს“ მაჟორიტარი დეპუტატობის კანდიდატ გიგა ბოკერიას, მას ამ დროისთვის 7,17 %-იანი მხარდაჭერა აქვს.

ამასთან, ცენტრალური საარჩევნო კომისიის წინასწარი მონაცემებით (2556 უბანი), „ქართული ოცნება-დემოკრატიულ საქართველოს“ ხმების 48.8%, „ერთიანი ნაციონალური მოძრაობა - გაერთიანებული ოპოზიცია ძალა ერთობაშიას” 26.07%, ხოლო "ევროპული საქართველო - მოძრაობა თავისუფლებისთვის" - 3.79% აქვს.