"სულ რომ გერმანული საავადმყოფოები გადმოვიტანოთ საქართველოში, სისტემა ვერ გაუძლებს თუ ჩვენ ყველა გავხდებით ავად და ეს მოხდება თუ არ დავიცავთ წესებს" - პაატა იმნაძე

დაავადებათა კონტროლის ეროვნული ცენტრის ხელმძღვანელის მოადგილის, პაატა იმნაძის განცხადებით, ვერც ერთი სისტემა, ვერც ერთი ექიმი, ვერც ერთი საავადმყოფო ვერ გაუძლებს, თუ ყველა ავად გახდება.

როგორც მან უწყებათაშორისი საკოორდინაციო საბჭოს სხდომის დასრულების შემდეგ „ინტერპრესნიუსის" კითხვის პასუხად განაცხადა, თუ მოქალაქეები ელემენტარულ წესებს არ დაიცავენ, ვერც ერთი ჯანდაცვის სისტემა ვერ გაუძლებს.

„მე, რასაც ვამბობ ხოლმე, პასუხს ვაგებ ჩემს სიტყვებზე. ერთხელ გაზაფხულზე ვთქვი და მეორედ შემოდგომაზე. ეს არ არის დაშინება, ეს არის სამწუხარო რეალობის დანახება, რაც მოგველის, თუ არ დავიცავთ ელემენტარულ წესებს.

კარგად ხედავთ რა ხდება ყველაზე განვითარებულ, ყველაზე მაგარ ქვეყნებში, ყველაზე მაგარი ჯანდაცვის სისტემით. ვერც ერთ ქვეყანაში, ვერც ერთი ჯანდაცვის სისტემა ვერ გაუძლებს, სულ რომ გერმანული საავადმყოფოებისგან გადმოვიტანოთ თავისი გერმანელი ექიმებით, ვერ გაუძლებს თუ ჩვენ ყველა ერთად გავხდებით ავად და ეს მოხდება, თუ არ დავიცავთ ელემენტარულ წესებს. ეს არის რეალობა. ვერც ერთი სისტემა ვერც ერთი ექიმი, ვერც ერთი საავადმყოფო ვერ გაუძლებს", - განაცხადა იმნაძემ.