"მსგავსი საუბარი არ შემდგარა" - ივანე ბურდულის პირველი კომენტარი ჩანაწერზე, რომლის მიხედვითაც ის თითქოს ცესკოს თანამშრომლის გადაბირებას ცდილობს

ივანე (ვანო) ბურდულთან დაკავშირებით, რომელმაც ცესკო რამდენიმე დღის წინ დატოვა, მედიაში აუდიოჩანაწერი გავრცელდა. ჩანაწერი სააგენტო "კვირამ" გამოაქვეყნა.

აუდიოჩანაწერის მიხედვით, ივანე ბურდული მისსავე თანამშრომლისგან, იურიდიული დეპარტამენტის სასამართლოებთან ურთიერთობის განყოფილების უფროსისგან მისი ნაბიჯის გამეორებას ითხოვს. ბურდული ქრთამის შეთავაზების სანაცვლოდ ხატია ფერსაშვილს სთავაზობს, რომ დატოვოს ცენტრალური საარჩევნო კომისია და გააკეთოს მადისკრედიტებელი განცხადებები.

გთავაზობთ ნაწყვეტს ჩანაწერიდან, რომელიც "კვირას" ინფორმაციით, მათ მესამე პირმა მიაწოდა.

• დაწერე განცხადება და გაქრი. მართლა გეუბნები. დაწერე განცხადება, გაქრი, თქვი, რომ ვაბშე არაფერს არ ვაკეთებ. ეგ იქნება ა, და იქნება ბ, დაწერე განცხადება, გამოდი, დააჯვი.
• ხო, პირველ შემთხვევაში მიიღებ 100 ლარს, მეორე შემთხვევაში მიიღებ - 300 ლარს ან 500 ლარს, მეტი რა გითხრა?!.. რავი, შენი არჩევანია. მე ჩემი არჩევანი გავაკეთე.

AMBEBI.GE გავრცელებულ აუდიოჩანაწერებზე კომენტარისთვის ივანე ბურდულს დაუკავშირდა:

- ეს ჩანაწერი არის ფეიკი, სისულელეა, ფაბრიკაციაა, გაყალბებულია და ჩვენს შორის მსგავსი საუბარი არ შემდგარა და მეტი კომენტარი ფიზიკურად არ შემიძლია გავაკეთო ამ საკითხზე. ერთს გეტყვით, რომ ეს არის ჩემი დისკრეტიდაციის მცდელობა.

- თქვენს ყოფილ თანამშრომელთან დიალოგსაც არ ადასტურებთ?

- არ მქონია მსგავსი სახის დიალოგი, მითუმეტეს მას შემდეგ კომუნიკაცია, რაც სამსახურიდან წამოვედი. მართლა არანაირი საუბარი ჩვენს შორის არ შემდგარა. სამსახურში ყოფნის დროს მქონდა უბრალოდ ადამიანური ურთიერთობები. მსგავსი საუბარი არათუ მასთან, არამედ არავისთან არ მაქვს.

- ჩანაწერში თქვენი ხმა არ ისმის?

- ვერ გეტყვით, როგორ კეთდება ეს, მაგრამ ეს საუბარი რომ არ შემდგარა, ამას გიდასტურებთ. ისევ ჩანაწერებით, ისევ ტყუილებით, ისევ ფეიკების მეშვეობით ხდება ადამიანის შეზიზღება საზოგადოებისთვის, მარაზმია უკვე ეს ყველაფერი და არის ბინძური ბრალდება, უნდათ, რომ შეაზიზღონ ჩემი თავი საზოგადოებას და თანამშრომლებს, ყველამ კარგად იცის, რომ მე ძალიან ვუფრთხილდები ურთიერთობებს და სწორედ მანდ მირტყამენ.

- სამართალდამცავები ხომ არ დაგიკავშირდნენ?

- არა, ჯერ არავინ დამკავშირებია.

ვცადეთ, ხატია ფარესაშვილთან დარეკვაც, მაგრამ მან ჯერჯერობით ჩვენს სატელეფონო ზარებს არ უპასუხა. ცნობისთვის, ბურდულმა ცენტრალური საარჩევნო კომისია რამდენიმე დღის წინ დატოვა. ცესკოში მაშინვე განაცხადეს, რომ მათთვის უცნობი იყო ბურდულის გადაწყვეტილების მოტივი. მედიაში ვრცელდებოდა ასევე ინფორმაცია იმის შესახებ, რომ ბურდული "ნაციონალური მოძრაობის" წევრის დიმიტრი შაშკინის ახლო მეგობარია.