"შემოდგომა ართვინში: მაჭახელას სილამაზე“ -  ფოტოები საქართველოს ისტორიული მხარიდან

თურქული გაზეთი "ჰურიეთი“ («Hürriyet») აქვეყნებს სტატიას, სათაურით: "შემოდგომა ართვინში: მაჭახელას სილამაზე“, რომელშიც საქართველოს მოსაზღვრე ართვინის პროვინციის (ილის) ბუნების საშემოდგომო პეიზაჟებია აღწერილი.

"გთავაზობთ ართვინის ილის ბორჩხას ილჩეში, მაჭახელაში, ქაჩქარის მთის ძირში გადაღებულ ფოტოსურათებს, რომლებზეც აქაური შემოდგომის სურათებია აღბეჭდილი.

ბორჩხასთან მდებარე მაჭახელა დღეისათვის თურქეთში პირველი და ერთადერთი ბიოსფერული ნაკრძალია, რომელიც იუნესკოს დაცვის ქვეშ იმყოფება. აქაური ბუნება მნახველს თავისი სილამაზით ატყვევებს და ენდემური მცენარეების სიმრავლით აოცებს.

საქართველოს საზღვართან, 900 მეტრ სიმაღლეზე, მთებში, ამჟამად შემოდგომაა დამდგარი, მისი მნახველი ვიზუალური დღესასწაულის მონაწილე გახდება: საშემოდგომოდ ფერშეცვლილი მცენარეები, ხეები ყვითელი ფოთლებით, ნისლით შებურული მთები და თოვლი განუმეორებელ სილამაზეს ქმნიან“, - წერს გამოცემა. წყარო

• ართვინის პროვინცია ჩრდილო–აღმოსავლეთ თურქეთში, შავი ზღვის რეგიონში მდებარეობს და მოიცავს 9 რაიონს, მისი ადმინისტრაციული ცენტრი - ქალაქი ართვინი მდებარეობს მდინარე ჭოროხის ნაპირზე, საქართველოს ისტორიულ მხარე ნიგალის ხეობაში, ბათუმიდან 50 კმ. - ში. ქალაქი ართვინი ფეოდალური საქართველოს ისტორიული პროვინციის კლარჯეთის ქალაქი იყო. მდებარეობდა მეტად მნიშვნელოვანი გზების შესაყარზე. ერთმანეთთან აკავშირებდა, ერთი მხრით, კარნუ-ქალაქს (არზრუმს), ბაიბურთს, არტაანს, არტანუჯსა და, მეორე მხრით, ბათუმ-გონიოსა და ხუფათს. მდ. ჭოროხის აუზი და, კერძოდ, ართვინი ძველთაგანვე კოლხეთის ბრინჯაოს მეტალურგიის მნიშვნელოვანი კერა იყო.

სიმონ კილაძე