წინასწარი ინფორმაციით, პოლიციამ აჭარის მთავრობის სახლთან აქციაზე ორი პირი დააკავა

ბათუმში, აჭარის მთავრობის სახლთან კვლავ დაძაბული ვითარებაა. ცოტა ხნის წინ აქციის მონაწილეებმა გზის გადაკეტვას სცადეს. ისინი სკანდირებენ: "მონებო, მონებო!“.

წინასწარი ინფორმაციით, აქციაზე ორი ადამიანი დააკავეს.

ადგილზე შეკრებილებმა პერფორმანსი მოაწყვეს, მათ სამთავრობო შენობასთან, სადაც აჭარის მთავრობის თავმჯდომარის, თორნიკე რიჟვაძის კაბინეტია, ბუშტები გაუშვეს, წარწერით: „მონა, იმოქმედე!“. ისინი თორნიკე რიჟვაძეს მოუწოდებენ, მოსახლეობას შეხვდეს და მათ პრობლემებს გაეცნოს.

პერფორმანსს აქციის მონაწილეებსა და სამართალდამცავებს შორის დაპირისპირება მოჰყვა. არეულობის შედეგად ერთი ადამიანი შეუძლოდ გახდა. გარდა ამისა, დაზიანდა კარვებიც, რომელიც აქციის მონაწილეებს აქვთ გაშლილი.