ავტორი:

ოპოზიციისა და ხელისუფლების მოლაპარაკებათა მე-4 რაუნდი დასრულდა: "ძალიან ცხარე კამათი იყო" - რაზე შეთანხმდნენ ან ვერ შეთანხმდნენ მხარეები?

ოპოზიციისა და ხელისუფლების მოლაპარაკებათა მე-4 რაუნდი დასრულდა: "ძალიან ცხარე კამათი იყო" - რაზე შეთანხმდნენ ან ვერ შეთანხმდნენ მხარეები?

ოპოზიციასა და ხელისუფლებას შორის გამართული მოლაპარაკებების მეოთხე რაუნდი დასრულდა. აი, რა კომენტარები გააკეთეს მხარეებმა შეხვედრის შემდეგ:

„სტრატეგია აღმაშენებლის“ ლიდერი, გიორგი ვაშაძე:

"რიგგარეშე არჩევნებთან დაკავშირებით პროგრესი არ არის... არის ახალი საკითხები რაც დაისვა, კვლავ დგას რიგგარეშე არჩევნების საკითხი, კვლავ დგას პოლიტპატიმრების საკითხი. სიახლეები არის საარჩევნო რეფორმასთან დაკავშირებული საკითხები და ასევე, საპარლამენტო არჩევნების სისტემა და თვითმმართველობის არჩევნების სისტემა, თუმცა იქაც არ არის შეთანხმებული ეს საკითხები ბოლომდე, ამიტომ ყველაფერს აკეთებენ მოდერატორები, რომ პოზიციების დაახლოება მოხდეს. მთავარია, რომ პროცესი მიდის, არ ვიცი, სადამდე მიგვიყვანს ეს პროცესი, თუმცა „სტრატეგია აღმაშენებლის“ გუნდი მზად ვართ, რომ ბოლომდე მივიღოთ პროცესებში მონაწილეობა...

პარლამენტში შესვლას და იმ უტიფარ სპეკულაციებს, რაც დღეს დაიწყეს, ვუპასუხებ, რომ პარლამენტში შესვლას შეთანხმების გარეშე არ აპირებს „სტრატეგია აღმაშენებელი“, არც განვიხილავთ და პირველივე დღიდან ამას ვამბობთ და კიდევ ერთხელ ვამბობ, რომ ეს იყო ძალიან ბინძური თავდასხმა ჩვენზე. იმედი მაქვს, რომ იქნება შეთანხმება თუ არ იქნება შეთანხმება, არ იქნება შეთანხმება, რა ვუყოთ?! ერთი რამ შემიძლია საჯაროდ ვთქვა, რომ საუბარია როგორც საპარლამენტო საარჩევნო სისტემაზე, ასევე თვითმმართველობის საარჩევნო სისტემაზე, ასევე საარჩევნო რეფორმებზე. რიგგარეშე არჩევნებთან დაკავშირებით პროგრესი არ არის".

პარტია „მოქალაქეების“ ლიდერი, ალეკო ელისაშვილი:

"ვისაც ბედნიერი ყიჟინა აქვს დაცემული, არ შევთანხმებულვართ. ძალიან ცხარე კამათი იყო ბევრ საკითხთან დაკავშირებით, რაღაც საკითხებზე შევთანხმდით, რაღაცებზე - ვერ... ლამის ვეხვეწე ელჩებს, რომ მომცენ უფლება, ვილაპარაკო დეტალებზე, რომ ხალხმა გაიგოს რაზე ვლაპარაკობ. ერთი სულ მაქვს ხალხს მოვუყვე, რაზე მიდის ლაპარაკი, რაზე ვარ თანახმა და რაზე არა. „ქართული ოცნება“ რას ითხოვს და იხვეწება, არ მაინტერესებს. ელჩებმა დაჟინებით გვთხოვეს, ლამის გვეხვეწნენ, არ მოყვეთ დეტალებიო. რა თქმა უნდა, რომ ძალიან მალე უნდა შევხვდეთ და გაგრძელდეს ეს ყველაფერი. უსინდისო ვიყო, ერთი სული მაქვს დეტალებზე ვილაპარაკო და ყველას გავცე პასუხი, აქ რაზე ვლაპარაკობთ და რისთვის ვართ მზად. არ შევდივარ პარლამენტში და ვინც მაბრალებს ამას, რომ შევედი პარლამენტში, უბრალოდ არის ტუტუცი და სათითაოდ გავცემ პასუხს ყველას. სადღაც წინ წავიწიეთ, სადღაც ისევ გაჩერებულები ვართ".

„ლელოს” ერთ-ერთი ლიდერი, ბადრი ჯაფარიძე:

"4 ძირითადი საკითხია: ვადამდელი არჩევნები, პოლიტიკური პატიმრების საკითხი, საარჩევნო სისტემის საკითხი და საარჩევნო ადმინისტრაციის საკითხი - პირველ ორ საკითხში დაშორებულები ვართ ერთმანეთისგან, მესამე და მეოთხე საკითხზე გარკვეულწილად დავახლოვდით... ჩვენ უფრო მნიშვნელოვან საკითხებზე ვსაუბრობთ, ვიდრე თამარ ჟვანია გადადგება თუ არ გადადგება. ვსაუბრობთ ყველა საკითხზე განუწყვეტლივ, ამ საკითხებს პერსპექტივა აქვს მანამ, სანამ დიალოგი გრძელდება. დამატებით რაუნდთან დაკავშირებით ხვალ უნდა შევთანხმდეთ".

პოლიტიკური პარტია „გირჩის“ ერთ-ერთი ლიდერი, ზურაბ ჯაფარიძე:

"ვლაპარაკობთ, რომ იქნებ შევძლოთ და დავაახლოვოთ პოზიციები. გუშინ გავიარეთ პუნქტობრივად ოპოზიციის ერთიანი შეჯერებული პოზიცია და ხელისუფლების მიერ მოტანილი წინადადება. გუშინ გამოიკვეთა გარკვეულ პუნქტებში თანხვედრები და ასევე, პუნქტები, სადაც პოზიციები ძალიან დაცილებულია. დღეს უბრალოდ მოხდა რაღაცების დაზუსტება, ტექნიკური საკითხების, რომელიც ეხება, ძირითადად, საარჩევნო ადმინისტრაციის საკითხს".

„ევროპული საქართველოს“ ერთ-ერთი ლიდერი, დავით ბაქრაძე:

"ოპოზიციისთვის მთავარ საკითხებში - რიგგარეშე არჩევნებსა და პოლიტპატიმრებზე ფუნდამენტური განსხვავებაა პოზიციებს შორის, შედეგი და დაახლოება არ გვაქვს...

დღესაც ფასილიტატორების მხრიდან იყო თხოვნა, რომ მინიმალური ინფორმაცია გაიცეს, ამიტომ პასუხს ვცემ ამ თხოვნას და არ გავახმოვანებ „ქართული ოცნების“ პოზიციებს, „ქართულმა ოცნებამ“ თავად ილაპარაკოს საკუთარ პოზიციებზე, მაგრამ შემიძლია გავახმოვანო ის, რაც არის ჩვენი პოზიცია და ეხება მოლაპარაკების ძირითად მიმდინარეობას.

მოლაპარაკებაზე 4 ძირითადი საკითხია, რომელიც ოპოზიციისთვის მნიშვნელოვანია და მიდის საუბარი. პირველი საკითხი უკავშირდება რიგგარეშე არჩევნების დანიშვნას, მეორე, პოლიტპატიმრების საკითხია, მესამე, საარჩევნო სისტემის შესაძლო ცვლილება, მეოთხე საარჩევნო კოდექსში ცვლილება, რომელიც განაპირობებს საარჩევნო გარემოს შეცვლას.

პირველ ორ საკითხთან დაკავშირებით არსებობს ფუნდამენტური სხვაობა პოზიციების მხარეებს შორის, აქ შეთანხმების რესურსი არ ჩანს. შემიძლია გითხრათ ჩემი პარტიის პოზიცია, რომ ამის გარეშე არ განვიხილავთ კრიზისის მოგვარებას და პარლამენტში შესვლას.

საარჩევნო სისტემის შეცვლაზე გარკვეული კომპრომისული წინადადებები იყო, შეთანხმებული არ არის, მაგრამ ვფიქრობ, რაღაც გარკვეული რესურსი არსებობს, რომ საარჩევნო სისტემა შეიცვალოს, ოღონდ ეს ვერ ცვლის ჩვენთვის რიგგარეშე არჩევნების საკითხს. რაც შეეხება საარჩევნო გარემოს, აქ არსებობს გარკვეული საკითხები, უფრო მეტად ტექნიკური შინაარსის, სადაც შეთანხმება შესაძლებელია, მაგალითად როგორ გაუმჯობესდეს უბნებზე ვითარება და ხმები როგორ იყოს დაცული. არსებობს საკითხები, სადაც შეთანხმებისგან შორს ვართ, იგივე ცენტრალურ საარჩევნო კომისიასთან მიმართებაში. ოპოზიციისთვის მთავარ საკითხებში რიგგარეშე არჩევნებზე და პოლიტპატიმრებზე ფუნდამენტური განსხვავებაა პოზიციებს შორის შედეგი და დაახლოება არ გვაქვს, საარჩევნო გარემოსთან და საარჩევნო სისტემასთან დაკავშირებით გარკვეული კონტურები არსებობს რომ რაღაც საკითხებზე შეთანხმება შედგეს".

„ლეიბორისტული პარტიის“ ლიდერი შალვა ნათელაშვილი:

"ვითხოვთ ივანიშვილის ოლიგარქიული რეჟიმის დამთავრებას და რეჟიმი ითხოვს, დარჩეს ხელისუფლებაში დაუსჯელად, უპრობლემოდ და სხვა დათმობებზე მოდის - საარჩევნო კოდექსზე და სხვადასხვა ლაი-ლაი.

დარბაზში უნდა იჯდეს მხოლოდ „ქართული ოცნება“ სამარცხვინოდ. მთელი მსოფლიოს თვალწინ კიდევ ერთხელ უნდა გაშიშვლდეს ივანიშვილის დანაშაულებრივი ბანდა.

დავაფიქსირეთ იგივე პოზიციები, რომ ახალი არჩევნების გარეშე პარლამენტში არ შევდივართ. ოპოზიციამ ხელი მოაწერა დეკლარაციას იმის თაობაზე, რომ ახალი არჩევნები უნდა ჩატარდეს და შესაბამისად, არავინ არ გასულა ამ დეკლარაციის ფორმატიდან. არაფერი საიდუმლო მოლაპარაკებებში არ არის. ვითხოვთ ახალ არჩევნებს.

შევთანხმდით იამზე, რომ ვრჩებით ჩვენ-ჩვენს პოზიციებზე. მუშაობა და მოლაპარაკებები გრძელდება, მაგრამ გადაწყევტილება მიღებული იქნება ისე, როგორც ამას მოითხოვს ისტორია და ჩვენი ხალხი. პარლამენტის პირველი სხდომა ჩატარდება ოპოზიციის გარეშე და სანამ არ დაინიშნება ახალი საპარლამენტო არჩევნები, ივანიშვილის ჯგუფი სამარცხვინოდ იჯდება პარტიულ კრებაზე, რომელსაც ერქმევა პარლამენტი, მაგრამ ის არ იქნება პარლამენტი".

პარლამენტის თავმჯდომარე, არჩილ თალაკვაძე:

"დღეს ჩვენ გვქონდა კიდევ ერთი მნიშვნელოვანი შეხვედრა, რომელმაც დაგვაახლოვა შეთანხმებასთან... დღესაც იყო ხანგრძლივი შეხვედრა. მსურს „ქართული ოცნების" სახელით მადლობა გადავუხადო ჩვენს სტრატეგიულ პარტნიორებსა და მათ ელჩებს. დღეს ჩვენ გვქონდა კიდევ ერთი მნიშვნელოვანი შეხვედრა, რომელმაც დაგვაახლოვა შეთანხმებასთან და არის რეალური ალბათობა, რომ პოლიტიკურმა პარტიებმა შევძლოთ შეთანხმება ყველაზე მნიშვნელოვან საკითხზე, რომელიც პოლიტიკურ სტაბილურობას გამოიწვევს და გრძელვადიანი თანამშრომლობის საშუალებას მოგცემს. ეს არის საარჩევნო რეფორმის გაგრძელება. ჩვენ პრაქტიკულად ამ საკითხზე პოზიციები იმდენად გვაქვს დაახლოებული, შესაძლებელია სრულიად, რომ ეს გახდეს შეთანხმების მთავარი საკითხი.

რაც შეეხება დროს, რასაკვირველია, ყველას გვესმის, რომ საქართველოს პრეზიდენტმა უკვე დანიშნა სხდომა, ეს არის 11 დეკემბერი. რა თქმა უნდა, 11 დეკემბერს შედგება საქართველოს მეათე მოწვევის პარლამენტის პირველი სხდომა, ამიტომ, ჩვენ მანამდე უნდა გამოვიყენოთ დრო და შესაძლებლობა, რომ ჩვენი მოლაპარაკება დავასრულოთ წარმატებით. მომდევნო დღეებშიც გვექნება ერთი ან რამდენიმე შეხვედრა და ჩვენ უკვე შევეცდებით შეთანხმებას.

სხვა საკითხებზე თქვენ იცით "ქართული ოცნების" პოზიცია, ის არ შეცვლილა. პანდემიის მიუხედავად 2 მილიონამდე ჩვენმა მოქალაქემ უკვე გააკეთა თავისი არჩევანი, ჩვენ არ გვაქვს საფუძველი, რომ ეჭვქვეშ დავაყენოთ მათი არჩევანი. შესაბამისად, კიდევ ერთხელ მინდა განგიცხადოთ, რომ „ქართული ოცნების" მხრიდან, განმეორებითი არჩევნები ან მასთან მიახლოებული და დაკავშირებული რაიმე ვერსია არ განიხილება. ჩვენ დღეს ვიმუშავეთ საარჩევნო რეფორმასთან დაკავშირებით, რომლის გაგრძელების პოლიტიკური ნება „ქართულ ოცნებას" ჰქონდა და აქვს დღესაც...

11 დეკემბერს გაიმართება მეათე მოწვევის პარლამენტის პირველი სხდომა თუ რა შემადგენლობით - ეს დამოკიდებულია პოლიტიკური პარტიების გადაწყვეტილებაზე, რომელიც უნდა დაეფუძნოს დიალოგის შედეგებს. დიალოგი ჯერ არ დასრულებულა. დღეს ჩვენ გადავდგით კიდევ ერთი ნაბიჯი პოზიციების დასაახლოვებლად, ამიტომ უნდა დაველოდოთ დიალოგის დასრულებას, ჩვენ დაგვრჩა კიდევ ორი დღე ამისათვის. ჩვენ ბოლო დღეებში გარკვეული რადიკალური ჯგუფს ვხედავთ, რომელიც მედიაში გაკეთებული კომენტარებით ზეწოლას ახდენენ მოლაპარაკებებში ჩართულ მხარეებზე, რომ მათ მოლაპარაკების ყველა დეტალი წინასწარ გაასაჯაროვონ, რაც მოგეხსენებათ არამარტო საქართველოში, არამედ საერთაშორისო მოლაპარაკებებშიც კი ასეთი პრაქტიკა არ არის მიღებული. მოლაპარაკებები, როდესაც მიმდინარეობს, რა თქმა უნდა, გარკვეულ ბაზისურ ინფორმაციას ვაწვდით საზოგადოებას, მაგრამ დეტალები გასაჯაროვდება მას შემდეგ, რაც დასრულდება მოლაპარაკება. პოზიციები არის დაახლოებული და არის ალბათობა, რომ შეთანხმება შედგეს".

„ქართული ოცნების“ აღმასრულებელი მდივანი, ირაკლი კობახიძე:

"დღეს გაგრძელდა კონსულტაციები. ჩვენი მხრიდან განიხილება საარჩევნო რეფორმის საკითხები, რომელიც საკმაოდ ბევრი დეტალისგან შედგება და ბევრ საკითხთან დაკავშირებით არის შეჯერებული პოზიციები. ხვალ ან ზეგ შედგება ბოლო შეხვედრა იმიტომ, რომ სხდომა ახლოვდება და ძალიან დიდი იმედი გვაქვს, რომ ეს შეხვედრები წარმატებით დასრულდება. ოპტიმისტურად ვართ განწყობილნი. ბევრ საკითხზე შევაჯერეთ პოზიციები და ეს იძლევა ოპტიმიზმის საფუძველს...

მანდატების დათმობას რაც შეეხება, ეს მათი გადასაწყვეტია. თუ ზოგიერთი პარტია გადაწყვეტს, არ შემოვიდეს პარლამენტში, ჩვენ რა მექანიზმიც გვქონდა, იმ მექანიზმს ავამოქმედებთ. ანუ ჩვენ მეტ დროს დავუთმობთ ამ პარტიებს იმისთვის, რომ თუნდაც მოგვიანებით შემოვიდნენ პარლამენტში. მათ სადეპუტატო უფლებამოსილება არ შეუწყდებათ, ეს არის საბოტაჟის საწინააღმდეგო მექანიზმი, რომელიც კონსტიტუციაშია გათვალისწინებული. ნებისმიერ დროს, მაგალითად მომავალ წელს, შეეძლებათ დატოვონ ბოიკოტის რეჟიმი და შემოვიდნენ პარლამენტში. ისინი ისედაც იყვნენ ბოიკოტის რეჟიმში, პარლამენტმა წელიწადზე მეტი გაატარა მათი ბოიკოტის რეჟიმში, მარტო იჯდა უმრავლესობა. იგივე გაგრძელდება, შეიძლება, გარკვეული პარტიების მხრიდან, მაგრამ დიდ ხანს არ გაგრძელდება. ჩვენი ამოცანაა, რომ ყველა პარტიამ შეთანხმებას მოაწეროს ხელი ელჩების თანდასწრებით და დიდი იმედი გვაქვს, ყველა პარტია იქნება შეკრებილი. გრძელდება მოლაპარაკებები და ძალიან ბევრი მიმართულებით გვაქვს წარმატება, გაგრძელდება ეს პროცესი. დეტალებზე ვერ ვისაუბრებთ, მაგრამ საარჩევნო რეფორმის ბევრ ასპექტში პოზიციები შეჯერებული გვაქვს".

"გოჩა ლორთქიფანიძე ჰააგის სასამართლოში რამდენიმე თვეში შეუდგება უფლებამოსილების შესრულებას, მანამდე ჩვენს გუნდში გააგრძელებს საქმიანობას" - პრემიერი

"როგორც ფასილიტატორი, ვხედავ, რომ პარტიები ერთმანეთს უფრო შორდებიან, იმის ნაცვლად, რომ დაუახლოვდნენ" - კარლ ჰარცელი

იუსტიციის მინისტრის პოსტზე წარდგენილი გოჩა ლორთქიფანიძე ჰააგის სასამართლოს მოსამართლედ აირჩიეს