"ადამიანებმა, რომლებსაც მნიშვნელოვანი ალეგიული გამოვლინებები აქვთ, Pfizer-ის ვაქცინა არ გაიკეთონ" - ბრიტანეთის მარეგულირებლების გაფრთხილება

გაერთიანებული სამეფოს მარეგულირებლები იმ ადამიანებს, რომლებსაც ძლიერი ალერგიული რეაქციები ახასიათებთ, Pfizer/BioNTech-ის მიერ შექმნილ კორონავირუსის საწინააღმდეგო ვაქცინის გაკეთებას არ ურჩევენ, - ამის შესახებ ინფორმაციას The Guardian-ი ადგილობრივ მედიაზე დაყრდნობით ავრცელებს.

გამოცემის ცნობით, მას შემდეგ რაც გუშინ ორ მოქალაქეს ვაქცინაციის შემდეგ ალერგიული რეაქციები დაეწყო, დიდი ბრიტანეთის მარეგულირებელმა ორგანოებმა გაავრცელეს გაფრთხილება, რომ ადამიანებმა, რომლებსაც "მნიშვნელოვანი" ალერგიული რეაქციები აქვთ, ამჟამად Pfizer / BioNTech Covid-19 ვაქცინა არ გაიკეთონ.

შეგახსენებთ, გაერთიანებულ სამეფოში კორონავირუსის საწინააღმდეგო მასობრივი იმუნიზაციის პროგრამა გუშინ დაიწყო. Pfizer/BioNTech-ის მიერ შექმნილი ვაქცინით პირველ რიგში 80 წელს გადაცილებული პირები, მედიკოსები და მოხუცთა თავშესაფრების ბენეფიციარები და თანამშრომლები აიცრებიან. Pfizer/BioNTech-ის ინფორმაციით, ვაქცინის ეფექტურობა 95%-ია.