ავტორი:

ბრძოლა მხოლოდ საკუთარ თავებს გამოვუცხადოთ

ბრძოლა მხოლოდ საკუთარ თავებს გამოვუცხადოთ

21 დეკემბრიდან „ბიბლიის განმარტებების“ მე-17 ტომს შეიძენს მკითხველი გაზეთ „კვირის პალიტრასთან“ ერთად. გთავაზობთ უკვე ტრადიციად ქცეულ ბლოგს, რომელსაც სპეციალურად ჩვენი საიტის მკითხველისთვის, „ბიბლიის განმარტებების“ პროექტის ავტორი და მთავარი რედაქტორი, თამარ მამაცაშვილი ამზადებს:

***

მიდის და მიდის, არ ჩერდება დრო, ულმობელი და დაუნდობელი... და თუ არ იპოვი იმას, რასაც დრო ვერ ერევა, ისე მოგსპობს და გაგანადგურებს, როგორც აცამტვერებს ყველაფერს ამქვეყნიურს...

***

განა პანდემია არ არსებობს, განა ვირუსი არ ვრცელდება, განა ინფექცია ჩვენ არ დაგვემართება ან განა არასოდეს დავიხოცებით... უბრალოდ, ამ შიშმა ადამიანობა არ დაგვაკარგვინოს რა... ერთმანეთი არ დაგვავიწყოს... ამ დროებით სამყოფელში დარჩენა არ გვეგონოს ჩვენი ცხოვრების მიზანი და მთავარი გვახსოვდეს - ღმერთი თუ დავკარგეთ, მერე ყველაფერი სულერთი იქნება!

ცხელი გულები მისურვებია ყველასთვის, ჩემო მეგობრებო, სიყვარულს რომ ვერ იტევს, ისეთი - სიკვდილის შიშზე გამარჯვებულ სიყვარულს, მარადისობაში დამამკვიდრებელს!

***

ჯერ ისედაც დაძაბულ და დაზაფრულ სიტუაციას კიდევ ემატება ათასი ჭორ-მართალი, რასაც გაურკვეველი ძალები ავრცელებენ და კიდევ უფრო ამძიმებენ ადამიანთა აუტანელ ყოფას. გვაშინებენ, რომ მოტყუებით შეგვიყვანენ ჩიპებს და ეს იქნება მხეცის ნიშანი - რომ ჩვენ, ყველანი, დავიბეჭდებით ანტიქრისტეს ნიშნით.

დავიწყოთ იმით, რომ როგორც მარკოზ მახარებელი წერს მეორედ მოსვლასთან დაკავშირებით: "იმ დღისა და იმ საათისა არავინ არაფერი იცის, არც ანგელოზებმა ცაში, არც ძემ, არამედ მხოლოდ მამამ". ნებისმიერი წინასწარმეტყველება მეორედ მოსვლის ზუსტი დროის შესახებ არის ცრუ და არ ემსახურება ადამიანის ცხონების საქმეს. მუდმივი კვლევა ამ საკითხისა ასევე არ არის მაცხონებელი. თუ რატომ არის ეს ასე, ამის შესახებ "ბიბლიის განმარტებების" ახალი აღთქმის ნაწილში ნახავთ მამათა განმარტებებს.ახლა, რაც შეეხება მოტყუებით დაჩიპვას: ღმერთმა ადამიანი თავისუფალ არსებად შექმნა და მიანიჭა არჩევანის თავისუფლება. ეს იმას ნიშნავს, რომ ადამიანის საბოლოო ხვედრს, მხოლოდ მისივე არჩევანი განსაზღვრავს. იმისთვის, რომ ვცხონდეთ, უნდა ავირჩიოთ ღმერთი - სინანულით და სიყვარულით! ლურსმნებით ჯვარზე გაკრული იყო ავაზაკი, რომელმაც სიცოცხლის ბოლო წუთში გააკეთა სწორი არჩევანი და დიდი სინანულით სასუფეველი მოიპოვა.

ასე დაუსრულებელი შიშით ცხოვრება არ შეიძლება! მოდი, ჩვენ ჩვენი არჩევანი გავაკეთოთ რა - მოდი, დღესვე, ახლავე შევცვალოთ ჩვენი უღმერთო ცხოვრება. არავინ იცის, როდის რა გველოდება. ვიფხიზლოთ უფლის ერთგულებაში, არ ჩაგვეძინოს და უღმერთოდ ნუ გავატარებთ ცხოვრებას. თუ ვინმე ოდესმე მოგვთხოვს, რომ უარი ვთქვათ ქრისტეზე, აი, მაშინ დავდგეთ მტკიცედ, ერთგულ ჯარისკაცებად. ახლა კი ბრძოლა მხოლოდ საკუთარ თავებს გამოვუცხადოთ - საკუთარ ურწმუნო თავებს. და მოვემზადოთ დიდი ომისთვის, სადაც მშიშრები და ლაჩრები ვერ იომებენ! ამიტომ, მედგრად ვიყოთ და ნურაფრის ნუ შეგვეშინდება!

***

როცა ძალიან, ძალიან გვტკივა, მოთმენა რომ აღარ შეგვიძლია - ისე, აი, მაშინ, ნაცვლად კითხვისა: რატომ, რისთვის, უფალო? უნდა შევძლოთ და მთელი გულით, მთელი გონებით, მთელი ჩვენი არსებით აღმოვთქვათ: მადლობა, ღმერთო! იყოს ნება შენი! ეს არის საოცარი საიდუმლო სინერგიისა, ეს არის გზა ცხონებისა! აქ დასრულდება ყველა ტკივილი და დაიწყება სიხარული დაუსრულებელი!

უფლისმიერი ბედნიერება - სულის ნეტარება მოგვმადლოს ღმერთმა

***

როცა ჩვენს ახლობელს განსაცდელი აქვს, გავიფიქრებთ ხოლმე - მეც არ დამემართოსო. აი, აქ ვუშვებთ შეცდომას, რადგან, ჩვენ უკვე დაგვემართა და ვერ ვითავისებთ. თუკი სხვისი ტკივილი ისე არ გვტკივა, როგორც საკუთარი, გულგრილობა და სიყვარულის უკმარისობა გვჭირს...

რამდენს გაუძლებს ადამიანი? რამდენსაც იტვირთებს უფლის შეწევნით. მარტო მყოფი ვერაფერსაც ვერ გაუძლებს, მაგრამ ღვთის იმედად მყოფი მთელი სამყაროს ტკივილს დაიტევს.

მოსვენება უნდა დაგვაკარგინოს სხვისმა ტკივილმა, ფიქრით, გონებით, ლოცვით სულ მასთან უნდა ვიყოთ. შეიძლება ფიზიკურად ვერც შევძლოთ ბევრი ვერაფერი. თუ გულში გვეყოლება, აუცილებლად დავეხმარებით. ერთად ყოფნით გადავრჩებით ყველანი, ისეთი მძიმე დროა, სხვა ვერაფერი გვიშველის.

უფალმა შეგვაძლებინოს!

***

ვიწრო გზაა ჩვენი არჩევანი - გზა, რომელიც სავსეა განსაცდელებით, ტკივილებით, თავგანწირვით!.. ჩვენი საგზალი კი ამ გზაზე არის რწმენა და სიყვარული...

***

მალე ახალი წელი დადგება. მინდა, ეს ახალი წელი განსაკუთრებულად მივულოცო მათ, ვინც მარტოა, ვინც არც სანტას გაახსენდა და არც თოვლის ბაბუას, ვინც უსამართლოდ დაჩაგრეს, ვინც მიტოვებულია, ვისაც ატკინეს, ვისაც აწყენინეს, ვისაც სიკეთის წილ ბოროტებით მიუზღეს, ვინც სნეულებით იტანჯება, ვისაც შია, ვისაც სცივა, ვინც სხვა განსაცდელით არის გულდამძიმებული - ყველას, ვისაც ტკივილი აქვს გულში, - ჩემო კეთილო მეგობრებო, ჩემო ტკბილებო, 2020-ს წაეღოს თქვენი ტკივილი და განსაცდელი! ბედნიერების, სიხარულის, სიყვარულის წელი დაგვდგომოდეს. ნუ გეშინიათ, აუცილებლად მოვა ნუგეში და სიხარული!

ღმერთო, დალოცე ყველა დაჩაგრული და გაჭირვებული, შეეწიე და გააძლიერე!

***

21 დეკემბერს გამოდის ახალი აღთქმის მეორე ტომი - მათეს სახარების განმარტებების გაგრძელება.

მზის ზამთრის ბუნიობაა ამ დღეს და ღამე შემოკლებას დაიწყებს, შესაბამისად, დღის ხანგრძლივობა მოიმატებს. რაღაცნაირ ემოციას იწვევს ეს დღე - დასრულდა სიბნელის უპირატესობის პერიოდი და სინათლე იკრებს ძალას. ზუსტად იცი, რომ ახლა სიბნელე უკან დაიხევს. იქნება ბევრი დღე, ბევრი მზე, ბევრი სითბო.

ჩვენი დაღმართიც დასრულდება, როცა იქნება! აუცილებლად დასრულდება! და მოვა სიხარული, იმედი, ბედნიერება - ყველას გულში, ყველა ოჯახში! სუულ ყველგან!

შეგვეწიოს წმინდა მათე მახარებლის მადლი მისი სახარების ყველა წამკითხველსა და გამთავისებელს.

21 დეკემბრიდან - გაზეთ „კვირის პალიტრასთან“ ერთად, „ბიბლია განმარტებებით“, მე-17 ტომი! არ გამოგრჩეთ!

მოუსმინე პირველ თავს უფასოდ და შეიძინე აუდიოწიგნი 30%-იანი ფასდაკლებით - gudabooks.ge-ს ახალი შეთავაზება აქვს

21 დეკემბრიდან უნიკალური პროექტის “ბიბლია განმარტებებით“ მე-17 ტომი გამოიცემა

#სასწაულიწიგნებშია - რა ვაჩუქოთ საახალწლოდ 8-12 წლის მოზარდებს