"ძალიან ბევრს ჭამდა" - რას ამბობს ბარაკ ობამა შვილის ბოიფრენდზე, რომელთან ერთადაც აშშ-ის ყოფილ პრეზიდენტს კარანტინში ყოფნა მოუწია

ამერიკის შეერთებული შტატების ყოფილი პრეზიდენტი, ბარაკ ობამა ღიად საუბრობს იმ გამოწვევებზე, რომლის წინაშეც მისი ოჯახი კარანტინის პერიოდში აღმოჩნდა. ობამას თქმით, კარანტინის საწყის ეტაპზე მათთან ყოფნა მოუწია მისი ქალიშვილის, მალიას ბრიტანელ ბოიფრენდს. ამის შესახებ "ინდეფენდენთი“ წერს.

ობამამ კარანტინში ცხოვრების დეტალებზე The Bill Simmons Podcast-ში ისაუბრა, სადაც სთხოვეს იმ პერიოდის ფავორიტ მომენტებზე ესაუბრა. ყოფილი პრეზიდენტის თქმით, ოჯახში გატარებული დრო სასიამოვნო იყო.

“სასიამოვნო იყო, რადგან გოგონებმა თინეიჯერობის პერიოდი უკვე უკან მოიტოვეს, გრძნობ, რომ დიდები არიან და მაინც უყვარხარ, მაინც შენს გვერდით სურთ დროის გატარება", - ამბობს ის. ობამას თქმით, კარანტინის დროს ოჯახის წევრები სხვადასხვა თამაშებით ერთობოდნენ და მათ გვერდით იყო უფროსი ქალიშვილის, მალიას ბოიფრენდიც.

"კარანტინის პირველი თვე, ისევე როგორც ბევრმა სხვა ოჯახმა, სხვადასხვა სამაგიდო თამაშებში გავატარეთ, ვერთობოდით, თუმცა მალიას და საშას თანდათან ეს მოსწყინდათ“, - ამბობს ობამა.

მალიას ბოიფრენდზე საუბრისას კი აღნიშნა, რომ ის "შესანიშნავი ახალგაზრდაა - "პანდემიის დროს შტატებში ჩარჩა, ბრიტანეთში ვეღარ დაბრუნდა, ამიტომ ჩვენთან ცხოვრობდა“, - ამბობს აშშ-ის ყოფილი პრეზიდენტი.

შვილის შეყვარებულზე საუბრისას ობამამ თქვა, რომ ის გააკვირვა, თუ რამდენს ჭამდა სტუმარი.

"რადგანაც ვაჟი არ მყავს, არ ვიცოდი, რამდენს ჭამენ ახალგაზრდა კაცები და ამან გამაკვირვა. უცნაური იყო იმის ყურება, თუ რამდენს ჭამდა. ჩემი სასურსათო ხარჯები 30%-ით გაიზარდა“, - იხუმრა ობამამ.

ბარაკ და მიშელ ობამას ორი ქალიშვილი ჰყავთ, მალია და საშა. მალია 22 წლისაა, ხოლო საშა 19-ის.