ავტორი:

რამდენი ექიმი მკურნალობს კოვიდპაციენტებს, როგორია საწოლფონდის მონაცემები და რამდენი ტესტია ჩატარებული - ჯანდაცვის მინისტრის ანგარიში

რამდენი ექიმი მკურნალობს კოვიდპაციენტებს, როგორია საწოლფონდის მონაცემები და რამდენი ტესტია ჩატარებული - ჯანდაცვის მინისტრის ანგარიში

ჯანდაცვის მინისტრობის კანდიდატის, ეკატერინე ტიკარაძის განცხადებით, დღემდე ქვეყანაში კორონავირუსის 1 მლნ 800 ათასზე მეტი ტესტი ჩატარდა.

ამასთან, ტიკარაძის თქმით, კორონავირუსის მართვაში ჩართული ონლაინ კლინიკების რაოდენობა გაზაფხულიდან დღემდე, 25-დან 65-მდე გაიზარდა. როგორც ტიკარაძემ პარლამენტის კომიტეტების გაერთიანებულ სხდომებზე განაცხადა, ონლაინ კლინიკის ექიმების მიერ 250 000-მდე ზარზე მოხდა რეაგირება.

„ჩვენს მოქალაქეებს აქვთ ძალიან ფართო წვდომა გეოგრაფიული და მოცულობით თვალსაზრისით და 250-ზე მეტ ლაბორატორიასა და პირველადი ჯანდაცვის ცენტრში მათ შეუძლით ისარგებლონ ტესტირებით, ამის საჭიროების შემთხვევაში. დღეისთვის არის ჩატარებული 1 მლნ 800 ათასზე მეტი ტესტი. პირველადი ჯანდაცვის სექტორის უდიდესი როლი აქვს კოვიდის მართვაში. მიმდინარე წლის 2 აპრილიდან ჯანდაცვის სამინისტროს ინიციატივით შეიქმნა ონლაინ კლინიკების პლატფორმა, რომლის ფარგლებშიც ოჯახის ექიმების მიერ, ყოველდღიურად ხორციელდება კოვიდ პაციენტების დისტანციური მართვა. თავდაპირველად პროცესში ჩართული იყო 25 ონლაინ კლინიკა. დღეისათვის კლინიკების რაოდენობა 65-მდეა გაზრდილი. 2 აპრილიდან დღემდე ონლაინ კლინიკის ექიმების მიერ მოხდა 250 000-მდე ზარზე რეაგირება და შემდგომი მსვლელობის მიცემა“, - განაცხადა ტიკარაძემ.

ამასთან, ტიკარაძის თქმით, დღეს კორონავურუსით ინფიცირებულთა მკურნალობაში 13 300-ზე მეტი ექიმია ჩართული.

“ინფიცირების შემთხვევების 60%-ზე მეტი ბინაზე მკურნალობის რეჟიმშია. ის ფაქტი, რომ ინფიცირებულთა ნახევარი რჩება ბინაზე და კლინიკაში რეფერალის საჭიროება არ არის მაღალი, ცხადყოფს, რომ პროცესი ეფექტიანად მიმდინარეობს. ჩვენი ამოცანაა მედპერსონალი იყოს მუდმივად ინფორმირებული განახლებადი მიდგომების შესახებ. სწორედ ამიტომ სახელმწიფო პარტნიორ ორგანიზაციებთან ერთად მუდმივად ახორციელებს ოჯახის ექიმების გადამზადებას. ყველა ოჯახის ექიმის გადამზადება განხორციელდა 4-ჯერ, ხოლო 2-ჯერ სოფლის ექიმების სრული გადამზადება მოხდა. გასულ თვეში ჯანდაცვის სამინისტრომ საკუთარ ბაზაზე შექმნა ორი ონლაინ კლინიკა, რომელშიც ჩართულია 228 თანამშრომელი ორი მიმართულებით. ერთი მიმართულება რჩება ოჯახის ექიმის მიმართულება, მეორე არის მონიტორის მიმართულება, რომელიც ჩვენი ექიმების მომსახურების ხარისხს აკონტროლებს. მხოლოდ ამ ორი ონლაინ კლინიკის მხრიდან 28 ათასზე მეტი სიმპტომური პაციენტია ნამართი და ამ ერთი თვის განმავლობაში 112 ათას ზარზე მეტზე არის რეაგირება განხორციელებული. მონიტორინგის სამსახურის მიერ გაწეული სამსახურის ხარისხის კონტროლის მიზნით მოხდა 303 ათას პაციენტთან დაკავშირება“, - განაცხადა ტიკარაძემ.

ტიკარაძის განცხადებით, ქვეყანაში საწოლფონდის რაოდენობა მარტის თვიდან დღემდე 10-ჯერ არის გაზრდილი და 96 კლინიკაში 7200 საწოლია მობილიზებული. მისი თქმით, ამ რაოდენობას ემატება ასევე კლინიკურ სასტუმროებში არსებული 9500 საწოლი.

„თუ მარტის დასაწყისში საწოლფონდი შეადგენდა 15 კლინიკაში მობილიზებულ 826 საწოლს, მაჩვენებლი დღეისათვის არის 10-ჯერ გაზრდილი. დღეს სისტემაში მონაწილეობს 96 საავადმყოფო 7200 მდე საწოლით, რისი გაფართოების საშუალებაც ჩვენ, რა თქმა უნდა, კიდევ გვაქვს. საწოლების აღნიშნულ რაოდენობას დაემატა კოვიდის მართვაში ჩართული სასტუმროები. მოგეხსენებათ, წლის დასაწყისში სასტუმრო მხოლოდ კარანტინისთვის და ცხელების მქონე პაციენტებისთვის გამოიყენებოდა, დღეს უკვე სასტუმროს კლინიკური სტატუსი აქვს და იგი წარმოადგენს შუალედურ რგოლს ბინასა და ჰოსპიტალში მკურნალობას შორის. კლინიკურ სასტუმროებში წარმოდგენილია ის მაღალტექნოლოგიური სამედიცინო აღჭურვილობა, რომელიც საჭიროა შედარებით რთული მდგომარეობის მართვისთვის. სწორედ სასტუმროებით არის ჩანაცვლებული ის სავალე ჰოსპიტლები, რომელის გახსნისკენაც აქტიურად მოგვიწოდებდნენ კონკრეტული ჯგუფები. ჯანდაცვის სამინისტრომ კი ბევრად უფრო ორგანიზებული, უსაფრთხო და გამართული პრაქტიკა დანერგა კლინიკურ სასტუმროებში მკურნალობით, სადაც ინფიცირებულებს ზედამხედველობას უწევენ კვალიფიციური ექიმები. განსაკუთრებით უნდა აღვნიშნოთ, რომ კლინიკურ სასტუმროებში მედპერსონალს შორის ინფიცირების მაჩვენებელი არის დაბალი და გაზაფხულის შემდეგ მხოლოდ 3 მედპერსონალის დაინიფიცირება ფიქსირდება აქ. დღეისათვის კლინიკურ სასტუმროში მობილიზებულია 9500 საწოლი. სულ ახალხანს საქართველოში იცით, რომ იმყოფებოდა ძალიან მაღალი რანგის სტუმარი, რომელმაც მოინახულა მთელი ჩვენი სისტემა, კლინიკური სასტუმრო და აღნიშნა, რომ ეს არის ის პრაქტიკა, რომელიც უნდა გაზიარდეს სხვა ქვეყნებშიც და იქაც დაინერგოს,“ - განაცხადა ტიკარაძემ.

ამასთან, ეკატერინე ტიკარაძის თქმით, სამედიცინო პერსონალის სამედიცინო დაზღვევით უზრუნველსაყოფად მომავალ წელს მილიონნახევარი ლარია განსაზღვრული.

"მედპერსონალის საქმიანობის ნაწილში განსაკუთრებული ყურადღება მინდა გავამახვილო გადაუდებელი დახმარების ექიმებზე, რომლებიც შესაძლებლობიდან გამომდინარე უმოკლეს დროში ახერხებენ სწრაფ რეაგირებას მოქალაქეთა დასახმარებლად.

2020 წლის პირველი იანვრიდან გადაუდებელი დახმარება გაეწია მილიონ 200 ათას მოქალაქეს. სასწრაფოს დაგვიანება არაერთხელ გამხდარა განსჯის საგანი, რაზეც მინდა აღვნიშნო, რომ როდესაც ობიექტური კრიტიკა მოდის მოსახლეობიდან, მე ვარ სოლიდარული, მაგრამ როდესაც მიზანმიმართული ნეგატივი მოდის დესტრუქციული ჯგუფებიდან, ყველამ უნდა გავიხსენოთ, თუ რამდენად დიდი შრომის ფასად უწევს სასწრაფოს ექიმებს პანდემიის სირთულეებთან გამკლავება. დღეისთვის მნიშვნელოვნად არის შემცირებული სასწრაფო დახმარების გამოძახებაზე რეაგირების დრო, შესაბამისად, შემცირდა გამოძახების დაყოვნების მაჩვენებელი. გამოძახებაზე საშუალო მოლოდინის დრო წინა პერიოდში იყო საათი და 24 წუთი, რომელიც 20 წუთამდე არის შემცირებული. გადაუდებელი დახმარების გაუმჯობესება ჩვენი პრიორიტეტია.

2020 წელს გადაუდებელი დახმარების სამსახური სამინისტროს ქოლგის ქვეშ გაერთიანდა, ამავე წელს ერთად გადავდგით არაერთი მნიშვნელოვანი ნაბიჯი. ცენტრს 140 ახალი ავტომობილი გადაეცა, გაიხსნა სასწრაფო დახმარების 26 ახალი ადმინისტრაციული შენობა, სამედიცინო პერსონალის ხელფასი და მომავალ წელს ასევე განსაზღვრულია მილიონნახევარი ლარი, რათა უზრუნველყოთ ჩვენი სამედიცინო პერსონალის სამედიცინო დაზღვევა“, - განაცხადა ტიკარაძემ.

"პარტიებს მომდევნო 6 თვე საბიუჯეტო დაფინანსება არ შეუწყდება" - ანრი ოხანაშვილი

"ისე უნდა დაერხეს ქვეყანას, რომ ხალხი ქუჩაში გამოვარდეს - ასეთი განცდა აქვს ზოგიერთ ოპოზიციონერს" - ალეკო ელისაშვილი

"თვალჭრელიძის ქუჩის მიმდებარედ აღმოჩენილ უკანონო მშენებლობებთან კავშირი მერიის ერთ-ერთ თანამშრომელს დაუდასტურდა" - კახა კალაძე