"არ შეგეშინდეთ, გამოდით ქუჩაში, არა ჩემთვის, არამედ თქვენივე თავისა და მომავლისთვის" - მოსკოვში დაბრუნებული ნავალნის მიმართვა რუს ხალხს

რუსმა ოპოზიციონერმა, ალექსეი ნავალნიმ პატიმრობის შეფარდების შემდეგ ვიდეომიმართვა გაავრცელა, სადაც ხალხს აქციების გამართვისკენ მოუწოდებს.

„არ შეგეშინდეთ, გამოდით ქუჩაში, გამოდით არა ჩემ გამო, არამედ თქვენივე თავისა და მომავლისთვის. მათ ეშინიათ თქვენი ქუჩაში გამოსვლის. ეს არის პოლიტიკური ფაქტორი, რომლის იგნორირებაც შეუძლებელია. ამიტომ, არ შეგეშინდეთ, გამოდით ქუჩაში. გამოდით ქუჩაში არა ჩემთვის, არამედ საკუთარი თავისა და მომავლისთვის“, - აცხადებს ის.

სასამართლომ ნავალნი 30 დღით, 15 თებერვლამდე დააპატიმრა. ამის შესახებ ნავალნის პრესსპიკერი კირა იარმიში სოციალურ ქსელ „ტვიტერში“ წერს.

ცნობისათვის, ალექსეი ნავალნის სასამართლო პროცესი ხიმკის პოლიციის განყოფილებაში გაიმართა.

შეგახსენებთ, გერმანიიდან მოსკოვში დაბრუნებული რუსი ოპოზიციონერი, ალექსეი ნავალნი, „შერემეტიევოს“ აეროპორტში დააკავეს. რუსეთის პენიტენციური სამსახურის განმარტებით, პოლიტიკოსის დაკავების მიზეზი გამოსაცდელი ვადის პირობების დარღვევა გახდა.