"ახია ჩვენზე, მეტის ღირსი ვართ, ასეთი გაცვეთილი მედროვეებისთვის რომ გვემეტება ადგილი სიაში..." - რას წერს ნიკა მელია

რამდენიმე დღის წინ, აჭარის უმაღლესი საბჭოს დამოუკიდებელ დეპუტატს ირაკლი ჩავლეიშვილს არასამთავრობო ორგანიზაცია "ალტერნატივას" წევრმა ირაკლი ფანგანმა თავზე ნაგავი დააყარა. შსს-მ ფანგანი დააკავა, თუმცა მეორე დღეს გაათავისუფლა. ინციდენტს გამოეხმაურა „ნაციონალური მოძრაობის“ ერთ-ერთი წევრი, სალომე სამადაშვილი, რომელმაც ბათუმში მომხდარ ინციდენტს ამაზრზენი უწოდა.

"ერთნაირად სამარცხვინო ხალხია ის, ვინც ნაგავს აყრის ადამიანს და ისიც, ვინც ამას მიესალმება“, - დაწერა სოციალურ ქსელში სალომე სამადაშვილმა. მისი აღნიშნული პოზიცია გაიზიარა პარტიის ერთ-ერთმა ლიდერმა რომან გოცირიძემაც, რამაც "ნაცმოძრაობის" რიგ წევრებს შორის აზრთა სხვადასხვაობა გამოიწვია, ზოგიერთი სამდაშვილისა და გოცირიძისგან ბოდიშის მოხდას ითხოვს.

"ნაციონალური მოძრაობის" თავმჯდომარე ნიკა მელია კი "ფეისბუქის" პირად გვერდზე წერს:

"ახლა ვუსმინე ირაკლი ჩავლეიშვილს ტვ პირველზე. იდგა და დაფნის გვირგვინდადგმულივით ლაპარაკობდა უტიფრად, იდგა და შუბლის ძარღვგაწყვეტილი ლანძღავდა იმ პარტიას, რომლის მხარდამჭერთა ხმებითაც გახდა დეპუტატი. ახია ჩვენზე, მეტის ღირსი ვართ, ასეთი გაცვეთილი მედროვეებისთვის რომ გვემეტება ადგილი სიაში და ჩვენი პატრიოტი მხარდამჭრების ხმებით რომ ვსვამთ თბილ სავარძლებში.

ასეთ სტაჟიან მედროვეებს ნაგავი ნამდვილად არ უნდა დააყარო, მიუღებელიც არის და არ შეიძლება, ისტორიის სანაგვეზე კი უნდა მოისროლო. ეს შემთხვევა გაკვეთილად უნდა იქცეს ჩვენთვის და ასეც იქნება, ასეთი გადამფრენი ჩიტებისთვის ადგილი აღარ იქნება ჩვენს სიაში".