"არ მინდა კობახიძე! გინდათ ძალით დამაქორწინოთ პოლიტიკურად ამ ადამიანთან?" - ნიკა მელია

"ნაციონალური მოძრაობის" თავმჯდომარე ნიკა მელიამ ამბობს, რომ მისი პარლამენტში შესვლის საკითხს წერტილი უნდა დაესვას, რადგან არ აპირებს "კობახიძესთან ერთად საკანონმდებლო ორგანოში ჯდომას".

ამის შესახებ მან ღამის კურიერის ეთერში განაცხადა.

"არ მინდა ვიყო პარლამენტში, მაქვს მაგის უფლება თუ არა? არ მინდა პარლამენტში, არ მინდა იმიტომ, რომ ეს არ არის პარლამენტი. რატომ არ მიწყვეტენ უფლებამოსილებას? რადგან იციან, რომ არჩევნები მოიპარეს. ფასადური დემოკრატიის შექმნისთვის კი, "ქართულ ოცნებას" უნდათ რომ გამომიყენონ მე, მაგრამ არ შევდივარ. ირმა ინაშვილიც კი არ შევიდა პარლამენტში, რომლის პარტიაც ფაქტობრივად პოლიტიკური პარტნიორი იყო "ქართული ოცნების". არ მინდა კობახიძესთან ერთად იმ დარბაზში ჯდომა, სადაც უბრალოდ არაფერი მესაქმება. იქნებ, ერთი დიდი წერტილი დავუსვათ ამ საკითხს,"- განაცხადა ნიკა მელიამ.

მისი თქმით, ოპოზიციის მთავარი მოთხოვნა ახალი არჩევნებია და შემდეგ უკვე სხვა ცვლილებების განხორცილება.

"ჩვენი მთავარი მოთხოვნა არის ახალი არჩევნები. მერე დანარჩენი აქედან გამომდინარე სხვა ცვლილებების განხორციელებები. არ მინდა კობახიძე! გინდათ ძალით დამაქორწინოთ პოლიტიკურად ამ ადამიანთან? არ მინდა კობახიძე, თალაკვაძე არ მინდა, რომ იყვნენ ჩემი კოლეგები, მაქვს ამის უფლება?!

და ახლა ვეუბნები, მადლობა ღმერთს - პროკურატურის განცხადება გამიხარდა, იქნებ რამენაირად დაძლიონ კომპლექსები და ფობიები და შემიჩერონ უფლებამოსილება მეც და სხვა კოლეგებსაც, ნუ მე მაინც,"- აღნიშნა ნიკა მელიამ.