ეფექტურია თუ არა Pfizer-ის ვაქცინა Covid 19-ის "სამხრეთ აფრიკული" ვარიანტის მუტაციების წინააღმდეგ - რა აჩვენა კვლევამ

Pfizer Inc და BioNTech-ის კორონავირუსის საწინააღმდეგო ვაქცინა ვირუსის ახალი, ე.წ. „სამხრეთ აფრიკული ვარიანტის“ სამი ძირითადი მუტაციის წინააღმდეგ მხოლოდ უმნიშვნელოდ ნაკლებეფექტურია, - Reuters-ის ინფორმაციით, ამის შესახებ Pfizer-სა და ტექსასის უნივერსიტეტის სამედიცინო ფილიალის მეცნიერების მიერ ჩატარებულ კვლევაშია აღნიშნული.

აღსანიშნავია, რომ კვლევა ხელოვნურად დამუშავებულ ვირუსზე ჩატარდა, რომელიც სამხრეთ აფრიკაში აღმოჩენილი ვარიანტის სამ ძირითად მუტაციას შეიცავდა. კვლევამ ანტისხეულების ტიტრის დონის ორჯერ ოდნავ ნაკლები შემცირება აჩვენა, რაც იმაზე მიანიშნებს, რომ ვაქცინა ეფექტურია ვირუსის ე.წ. E484K და N501Y მუტაციების გასანეიტრალებლად, რომლებიც სამხრეთ აფრიკის ვარიანტში გვხვდება.

კვლევა იმ ადამიანებიდან აღებულ სისხლზე ჩატარდა, რომლებსაც კორონავირუსის საწინააღმდეგო ვაქცინაცია ჩატარებული ჰქონდათ. Reuters-ი წერს, რომ კვლევის დასკვნები შეზღუდულია, რადგან იგი არ მოიცავს ყველა მუტაციას, რომელიც სამხრეთ აფრიკის ახალ ვარიანტში გვხვდება.

კვლევის ავტორების თქმით, ისინი ამჟამად ამუშავებენ ვირუსს მუტაციების სრული შემადგენლობით და შედეგს დაახლოებით ორ კვირაში ელიან.