"პარაზიტ ბავშვებზე" მქადაგებელი დეკანოზი სასჯელის სახით მონასტერში განამწესეს

საპატრიარქოს გადაწყვეტილებით, დეკანოზს, რომლის ქადაგებამაც "პარაზიტ ბავშვებთან" დაკავშირებით საზოგადოების აღშფოთება გამოიწვია, "სასჯელად" მონასტერში წასვლა "მიესაჯა".

ამის შესახებ ინფორმაციას საქართველოს საპატრიარქოს საზოგადოებასთან ურთიერთობის სამსახური ავრცელებს:

"საზოგადოებაში არსებული ინტერესიდან გამომდინარე, დამატებით გაცნობებთ, რომ ჭიათურისა და საჩხერის ეპარქიის მღვდელმსახურს, დეკანოზ თადეოზ სარალიძეს დაედო საეკლესიო სასჯელად (ეპიტიმია) - მონასტერში განწესება გარკვეული ვადით" - ნათქვამია "ფეისბუქზე" გავრცელებულ განცხადებაში.

შეგახსენებთ, რამდენიმე დღის წინ სოციალური ქსელი აღაშფოთა მღვიმევის ყოვლადწმინდა ღვთისმშობლის შობის ტაძრის წინამძღვრის დეკანოზ თადეოზის (სარალიძე) საკვირაო ქადაგებამ.

ქადაგებისას მან კორონავირუსზე და პატარებში მის ახალ გამოვლინებაზე ისაუბრა და აღნიშნა, რომ მორწმუნე ბავშვებს არაფერი ემუქრებათ, თუმცა, ვინც "პარაზიტია" და ეკლესიას არ გამოადგება, გაზრდას სჯობს, პატარა მოკვდეს.