AstraZeneca-ს ვაქცინა ვირუსის გადაცემის რისკს ამცირებს - ოქსფორდელი მეცნიერების კვლევა

ოქსფორდელ მეცნიერებს საზოგადოებისთვის კარგი ამბავი აქვთ. მკვლევარებმა დაადგინეს, რომ Oxford-AstraZeneca-ს ვაქცინა მნიშვნელოვნად ამცირებს ვირუსის გადაცემის რისკს და გარდა ამისა, უზრუნველყოფს ვირუსისადმი მდგრადობას, დაცულობას პირველი დოზის მიღების შემდეგაც. ბრიტანეთის ხელისუფლებაში თვლიან, რომ ეს ამყარებს მათ იმედებს პანდემიის დამარცხებასთან დაკავშირებით.

"ყოველივე არის დემონტრირება იმისა, რომ აღნიშნული ვაქცინა ეფექტიანია, ის ამცირებს ვირუსის გადაცემას“ - ამბობს მეთ ჰენკოკი.

ბრიტანელი მკვლევარი, იმუნოლოგი, პროფესორი ელენ ფლეჩერი ამბობს, რომ ყოველივეს დასაზუსტებლად ჯერ კიდევ არის შესაბამისი კვლევები ჩასატარებელი, თუმცა წინასწარი მონაცემები იმედის მომცემია. "ამის დაზუსტებას და საბოლოოდ დადასტურებას, დრო დასჭირება", - ამბობს პროფესორი.

"ეს არის მართლაც შესანიშნავი სიახლე, მაგრამ კიდევ გვჭირდება კვლევების ჩატარება. ამიტომ მნიშვნელოვანია, რომ ვაქცინაციის შემდეგ კვლავ შევინარჩუნოთ სოციალური დისტანცია და ვატაროთ პირბადე", - ამბობს ბრიტანელი მკვლევარი, დაგ ბრაუნი.

ცნობისთვის, მსოფლიოს მასშტაბით ვაქცინაციის პროგრამა აქტიურად მიმდინარეობს. გამოცემა Bloomberg-ის ბოლო მონაცემების მიხედვით, ამ დროისთვის მსოფლიოში კორონავირუსის საწინააღმდეგო ვაქცინაცია 104.6 მილიონზე მეტ ადამიანს ჩაუტარდა. მათ შორის, აშშ-ში 33.7 მილიონზე მეტი ადამიანი აიცრა, რაც მოსახლეობის 10.2%-ს შეადგენს. აშშ-ს ჩინეთი მოჰყვება 24 მილიონზე მეტი ვაქცინირებული პაციენტით, რაც მოსახლეობის 1.7%-ს შეადგენს. ევროკავშირში კი, საერთო ჯამში ვაქცინაცია 13.4 მილიონ ადამიანს ჩაუტარდა.