ბათუმის ბავშვთა სახლის 25 აღსაზრდელსა და 7 თანამშრომელს კორონავირუსი დაუდგინდათ - როგორია მათი მდგომარეობა?

ბათუმში ფერიის ბავშთა სკოლა-პანსიონში ბოლო ერთი კვირის განმავლობაში 25 აღსაზრდელს კორონავირუსი დაუდასტურდა. ამის შესახებ აჭარის საზოგადოებრივი ჯანდაცვის ცენტრში განაცხადეს.

უწყების ინფორმაციით, კორონავირუსი ასევე დაწესებულების 7 თანამშრომელს დაუდგინდა. მათივე ინფორმაციით, პანსიონში ჰიგიენის ნორმები დაცულია და მაღალი რისკის მქონე პირები იზოლირებული არიან. ბავშვებზე კი პედიატრები უწყვეტ მეთვალყურეობას ახორციელებენ.

"მთელი ამ დროის განმავლობაში იყო მუდმივი კომუნიკაცია დირექციასა და ჯანდაცვის სამინისტროს შორის. თანამშრომელთა და აღსაზრდელთა მორიგი ტესტირების დროს გამოვლინდა შემდეგი: რამდენიმე ბენეფიციარს გამოეხატა რესპირატორული სიმპტომები და სწრაფი ტესტირებით განესაზღვრათ დადებითი შედეგი, რის შემდგომაც ყველა მათგანი მყისიერად გადაყვანილი იქნა კოვიდ-სასტუმროში.

განხორციელდა მთელი კონტიგენტის გამოკვლევა და ყველა საეჭვო შემთხვევაში ხდებოდა განმეორებითი ტესტირება, რის შედეგადაც გამოვლინდა დამატებით შემთხვევები. დღეის მდგომარეობით ჯამურად ფიქსირდება 32 შემთხვევა, მათგან 7 მოზრდილი და 25 ბავშვი. აქედან 30 არის კოვიდ-სასტუმროში, 1 სტაციონარში,1 ოჯახში",- განაცხადეს აჭარის საზოგადოებრივი ჯანდაცვის ცენტრში