"ბავშვს ეზოში წუწაობისთვის ფეხი მოტეხა... ბიჭი სახლიდან სათამაშოდ გავიდა და თავში შეშა დაარტყა" - გარდაცვლილი 14 წლის გოგოს ბიძაშვილი ბავშვის დედას ძალადობაში ადანაშაულებს

ქობულეთის მუნიციპალიტეტის სოფელ ქაქუთში, გარდაცვლილი 14 წლის გოგოს ბიძაშვილი "TV პირველთან" საუბრისას მოზარდის დედას შვილებზე ძალადობაში ადანაშაულებს.

"ჩემთან ერთად იყო, როდესაც ბავშვს უბრალოდ ეზოში წუწაობისთვის ფეხი მოტეხა და მე დამაბრალა, გამზდელმა დედამ მოტეხა ფეხი. ყველა, მთელი სამეზობლო გეტყვით, როგორი დედა არის. იმის გამო, რომ სახლიდან ფეხბურთის სათამაშოდ გავიდა ბავშვი, თავში შეშა დაარტყა, ბიჭ ბავშვს თავი აქვს გატეხილი, შეგიძლიათ უნახოთ. ვის ძალადობაზე უნდა ლაპარაკობდეს?!" - განაცხადა გარდაცვლილი გოგონას ბიძაშვილმა.

მის ნაამბობს ჟურნალისტებთნ საუბრისას ადასტურებს ასევე გარდაცვლილი მოზარდის ძმაც.

„დედასა და ბაბუას კონფლიქტის მიზეზი იყო დედის მიერ ჩემზე და დებზე განხორციელებული ძალადობა. ბავშვობაში დედა ჩვენზე ძალადობდა. თავზე რაც იარები მაქვს, დედის მიყენებულია და თმას ვერ ვიპარსავ. ნინის ფაქტის შემდეგ არ უძალადია გოგოზე არც ბაბუას და არც ბიძებს“, - განუცხადა გარდაცვლილი გოგოს ძმამ ჟურნალისტებს.

ცნობისთვის, გოგონას გარდაცვალების შესახებ ინფორმაცია 10 თებერვალს გავრცელდა. ამის შემდეგ შსს-მ ინფორმაცია გაავრცელა, რომლის თანახმად, პოლიციამ ქობულეთში 16 წლის ასაკს მიუღწევლის სხეულში სექსუალური ხასიათის შეღწევის ბრალდებით, 1997 წელს დაბადებული მამაკაცი დააკავა.

ბათუმის საქალაქო სასამართლომ მას აღკვეთის ღონისძიების სახით პატიმრობა შეუფარდა.

საქმეზე დღეს მოზარდის ბაბუა დააკავეს.